"Zirə" ötən tur azlıqda qalmasına rəğmən, çətinliklə də olsa, "Sumqayıt"ı məğlub etməklə vahid liderliyini bir qədər də möhkəmlətmişdi.

"Qartallar" çempionluğa və avrokuboka gedən yolda əsas rəqiblərindən olan "Neftçi"ni də büdrətmək istəyirdi. "Ağ-qaralar" isə "Araz-Naxçıvan"a gözlənilməz məğlubiyyətdən sonra azarkeşlərinin gözündə imicini düzəltmək niyyətindəydi.

Hakimin start fitindən sonra mübarizə əsasən meydanın mərəkəzində getdi. Hər iki tərəf maksimum ehtiyatlı idi. İlk təhlükə meydan sahiblərindən gəldi. Suma qapını yoxlasa da, hədəfə düşmədi. "Ağ-qaralar"ın buna cavabı isə dəqiqliklə yekunlaşdı. Eminin cərimə zərbəsindən qapı önünə asmasına yüksələn Matias hesabı açdı. Qoldan sonra da nominal qonaqlar "1 nömrə" kimi oynadı. Şinyaşikinin boş qapı önünə asmasına müdafiəçilər reaksiya verdi. Azərin həmləsi də qeyri-dəqiq alındı. Eminin kornerdən cərimə meydançasına ötürməsinə komanda yoldaşı yüksəlib zərbə endirsə də, qapıçı yerindəydi. Hissənin sonlarına yaxın "qartallar" təzyiqi artırdı. Bunun nəticəsiydi ki, "Neftçi"nin cərimə meydançasına soxulan zaman topu qəbul edən Sumanın ayağına Matias zərbə endirdi. Bu məqam referinin gözündən yayınsa da, VAR-dan xəbər gəldi. Baş hakim monitora yaxınlaşıb epizodu izlədikdən sonra “nöqtə”ni göstərdi. 44-cü dəqiqədə topa yaxınlaşan Qismət hesaba tarazlıq gətirdi. Komandalar fasiləyə bərabərliklə yollandı.

2-ci yarıya qonaqlar fəal başlasa da, onlar "qartallar"ın sıx müdafiə xəttini yarmaqda çətinlik çəkirdi. 51-ci dəqiqədə Eminin həmləsi qeyri-dəqiq alındı. "Zirə" buna Məqsədin gözəl zərbəylə cavab versə də, Brkiç əla seyvlə qolu əngəllədi. Bu qarşılıqlı hücumlardan sonra mübarizə yenə meydanın mərkəzində getdi. Oyunun sonlarına yaxın qonaqlar yenə təzyiqi gücləndirdi. Azərin qapı önünə ötürməsini qəbul edən Lebon çevrilib zərbə vursa da, qapıçı onun sevinməsinə imkan vermədi. Referinin final fiti mövsümdə "qartallar"ın ilk heç-heçəsini, "ağ-qaralar"ın isə növbəti xal itkisini rəsmləşdirdi. Təbii ki, bu heç-heçə “Zirə”yə sərf etdi.

Gözdən qaçmadı
* Oyunu izləyənlər arasında yığmanın baş məşqçisi Canni de Byazi, seleksiyaçı İlqar Qurbanov və PFL vitse-prezidenti Aslan Şahgəldiyev də var idi.
* Oyun bitəndən sonra Matias "Neftçi" fanatlarıyla 5-6 dəqiqə söhbət edərək, onların etirazlarını dinlədi. Daha sonra azarkeşlər onun adını səsləndirməklə dəstək verdilər.

ABDULLA İSMAYILOĞLU