Hər iki komanda mövsümə qələbəylə başlasa da, 2-ci turda səfərdə məğlub olmuşdu. Odu ki, bu oyunda tərəflər məğlub olmamaq üçün əlindən gələni edəcəkdi. Təbii ki, "boz qurd" Gəncəyə qələbə iştahı ilə gəlmişdi. Amma meydan sahibləri oyuna daha istəkli başladı.

Mate topu ələ keçirərək Juniora assistlik etdi. Amma onun zərbəsini qapıçı tutdu. "Sarı-göylər" fürsətləri boşa verdiyi məqamda qonaqlar tədricən topa nəzarət etməklə gəncəlilərin qapısı qarşısında çoxalmağa və təzyiqə başladı. Bunun nəticəsi 18-ci dəqiqədə özünü göstərdi. Serranonun cərimə meydançasına asması zamanı qapıçı çıxışda səhvə yol verdi. Ayağına gələn topu Petkov tora göndərməklə hesabı açdı.

Gəncəlilər şokdan ayılmamış daha bir qol buraxdı. Bruno gözəl ötürməylə Pusini qapıçıyla üzbəüz qoydu və albaniyalı şansı qaçırmadı. "Turan Tovuz" fərqi artırandan sonra daha ehtiyatlı oynamağa başladı. Meydan sahibləri isə qol axtarışı üçün irəli atıldı. Şuaybu Fəriddən topu oğurlayaraq qapını yoxlasa da, Bayramov yerində idi. Qonaqlar buna Petkovun zərbəsiylə cavab versə də, qolkiper qola imkan vermədi. İlk hissəyə əlavə olunan dəqiqələrdə Elnurun həmləsi də boşa çıxdı. Qonaqlar fasiləyə üstün yollandı. 2-ci yarıya "Kəpəz" fəal başladı. Elnurun cərimə zəbəsinə Aydın əla seyvlə cavab verdi. Şuaybu müdafiəçiləri çaş-baş salıb qapını yoxlasa da, son anda müdafiəçilər topu qapı xətdindən çıxardı. Juniorun qapı önünə asmasını qəbul edən Ehtiramın həmləsinə Şəhriyar blok qoydu.

Onanuqa ilə Turalın cəhdləri də Aydın üçün təhlükəli olmadı. 90-cı dəqiqədə Xəyal rəqib qapısına həmlə etsə də, Vasilyuçek 3-cü qola imkan vermədi. Oyuna əlavə olunan dəqiqələrdə meydan sahibləri fəallaşdı. Şuaybunun iti bucaq altından zərbəsinə qapıçı gözəl seyvlə cavab verdi. Nigeriyalının növbəti cəhdini isə Miller zərərsizləşdirdi. Son hücum "boz qurd"dan gəldi. Şəhriyarın qapı önünə asmasına Otto yüksəlib zərbə endirsə də, qapıçı yerində idi. Hakimin final fiti "Turan Tovuz"un qələbəsini rəsmləşdirdi. "Kəpəz" ardıcıl 2-ci məğlubiyyətini aldı. 

Gözdən qaçmadı
* Hər iki komandanın heyətində zədə üzündən erkən əvəzləmə oldu. Sərtan Taşkın və Mate Kvirkviya oyunu davam etdirə bilməyib yerini komanda yoldaşına verdi. 
* 2-ci hissədə qonaq futbolçular tempi öldürmək üçün tez-tez özünü yerə atmağa başladı. Faiq Hacıyev, Piruzi Marakvelidze, Belaji Pusi bu yöndə daha fəal idi. Bunu görə "Kəpəz" fanatları hakimə "ay hakim, Qəmlo demiş, bunların nazı ilə çox oynayırsan. Kartın yoxdu. Əlini cibinə sal və sarını göstər” dedi. 
* 88-ci dəqiqədən gəncəli azarkeşlər stadiona kütləvi halda tərk etməyə başladı. 
* Tovuz futbolçuları Kamal Bayramovun öncüllüyü ilə qələbəni azarkeşləriylə qeyd etdi. Bunu görə "Kəpəz"ın yaşlı azarkeşi "vaxt var idi bütün rəqiblər Gəncəyə qorxaraq gəlirdilər", - deyə təəssüfünü gizlətmədi.
* Gəncəli azarkeşlər paltardəyişmə otağına yollanan "Turan Tovuz" futbolçularını fitə basaraq nalayiq ifadələr səsləndirsə də, Ayxan Quseynov, Roderik Miller və Şəhriyar Əliyev buna alqışla cavab verdi, Kamal Bayramov isə qeyri-etik ifadə söyləyənlərə şəhadət barmağını göstərdi.

ABDULLA İSMAYILOĞLU