Hər tərəfin özünə görə motivasiyası var idi.

“Neftçi” daha bir uğursuzluğun liderlərlə xal fərqini artıracağını fərqinə varırdı, “Zirə” isə “Qarabağ”dan çox uzaq düşmək istəmirdi. Hakimin start fitindən sonra qonaqlar daha səliqəli ötürmələr hesabına top saxlamağa çalışırdı. "Qartallar" topu itirəndə hamılıqla meydanın "Neftçi"yə aid hissəsində pressinq tətbiq edirdi. Odu ki, qəsəbə təmsilçisi nə erkən qola, nə də "ağ-qaralar"ın topa sahib olmasına imkan verdi. "Zirə"nin heyətində Renato, Abbas, Rüstəm fəallığı ilə seçilirdi. Rüstəm topla təmin olunan kimi cinahlardan sürətlə rəqibin müdafiəsini yarmağa çalışırdı. İlk yarı hücum sarıdan kasadlığı ilə seçildi.

Fasilədən sonra "qartallar" daha fəal başladı. 47-ci dəqiqədə Məqsədin zərbəsini qapıçı kornerə çıxardı. Meydan sahibləri buna Ozobiçin 52-ci dəqiqədəki təhlükəli zərbəsiylə cavab versə də, Tyaqo topu sinəsinə sıxdı. Qarşılıqlı hücumlar şəraitində davam edən oyunun 60-cı dəqiqəsində hesab açıldı. Lebon sol cinahda Məqsədin başını gicəlləndirərək cərimə meydançasına asma etdi. Müdafiəçilərin gözündən yayın Rəhman topu başla qapının nəzarətsiz küncünə göndərdi. Təbii ki, bundan sonra "qartallar" irəli atırdı. 67-ci dəqiqədə Suma Rüstəmi qapıçıyla təkbətək çıxardı, ancaq Rza Cəfərov hokkey qapıçıları kimi oynayaraq qola imkan vermədi. 74-cü dəqiqədə Qismətin cərimə zərbəsindən qapı önünə asmasına Çantakias yüksəlib zərbə endirsə də, top inanılmaz şəkildə dirəkdən qayıtdı. Hissənin sonunda və oyuna əlavə olunan dəqiqələrdə Renato ilə Eldarın cəhdləri təhlükəli alınsa da, dəqiq olmadı. Hakimin final fiti "Neftçi"nin qələbəsini rəsmləşdirdi. "Zirə" üstün oyun sərgiləsə də, hesabda rəqibi üstələyə bilmədi. “Qartallar”ın “Neftçi”nin stadionu ilə bağlı qorxunc statistikası davam edir. Belə ki, “Zirə” bu stadionda keçirdiyi son 11 çempionat oyununda qələbəyə həsrət qalıb.

Gözdən qaçmadı
* Stadiona gələn 70-ə yaxın zirəli azarkeş "Qartallar" fanklubunun plakatını açmışdı.
* "Forza Neftçi" fanklubu Anatoli Banişevskinin şəkliylə tribunada yerini tutmuşdu.
* "Sportinfo.az"ın əməkdaşı Həbib Aslanov oyunu izləməyə qızı ilə gəlmişdi və övladına futbolun qaydalarını başa salırdı.
* 70-ci dəqiqədə baş hakim Eddi İsrafilova nəyisə izah edərkən Rəşad Sadıqov "Ay İnqilab, vaxtdan gedir eee", - deyə etirazını çatdırdı. Amma referi ona fikir vermədi.
* Oyun bitəndən sonra Adrian Mutu futbolçuları meydanda dövrəyə aldı. Rumıniyalı mütəxəssis yetirmələrinə nəyisə izah edirdi. Bundan sonra futbolçular azarkeşlərə tərəf gedərək onlara təşəkkür etdilər.

ABDULLA İSMAYILOĞLU