Ötən turda səfərdə “Qarabağ”a uduzan "dənizçilər" doğma publika önündə meydana qələbə üçün çıxmışdılar. Gəncəlilər isə yeni baş məşqçi Adil Şükürovla ilk oyununa çıxırdı. "Sarı-göylər" yaxşı oyun sərgiləməklə evə məğlubiyyətsiz dönməyi hədəfləyirdilər.

"Football-plus.az" xəbər verir ki, qonaqlar oyuna fəal başladı.

İlk 5 dəqiqədə "sarı-göylər" əvvəlcə Elnur, ardından Papunaşvili ilə qapını yoxladı. Birində top yan keçdi, digərində isə dirəyə dəydi. Bundan sonra oyun qarşılıqlı hücumlar şəraitində keçdi. Qomisin zərbəsinə Rodriges seyvlə cavab verdi. Elnurun cəhdi zamanı Səlahət topu tutdu. 25-ci dəqiqədə Amil qapıçıyla təkbətək çıxsa da, məğlub oldu. Ehtiramın cərimə zərbəsi az fərqlə qapıdan yan keçdi. Nuno qapıçını keçib zərbə vursa da, son anda müdafiəçilər qola imkan vermədi. 36-cı dəqiqədə Bardeanın başla zərbəsi dirəkdən qayıtdı. Nunonun növbəti cəhdində də nəticə hasil olmadı. İlk yarı qolsuz keçsə də, komandalar hücumda kreativliklə seçildi. Fasilədən sonra da matç qarşılıqlı hücumlar şəraitində keçdi. Turalın zərbəsi qapının üstündən keçdi. Yusifin cəhdi boşa çıxdı. Vüsalın aşırma zərbəsi hədəfə düşmədi. 64-cü dəqiqədə Nuno boş qapını yoxlasa da, Ehtiram qola imkan vermədi. Qonaqlar buna Vüsalın künc nöqtəsindən zərbə-ötürmə qarışıq həmləsiylə cavab versə də, Səlahət topu kornerə çıxardı. Matenin cəhdi də arzulanan kimi olmadı. Bir sözlə, son ana qədər qolun yolunu gözlədik, ancaq o gəlmədi. Təbii ki, heç-heçə ilk növbədə “Kəpəz”ə sərf etdi. Gəncəlilər ardıcıl 2-ci oyunda uduzmadısa, “dənizçilər” ardıcıl 2-ci oyunda qələbəyə həsrət qaldı.

Gözdən qaçmadı
* Havanın mülayim olmasına rəğmən, stadionda azarkeş sayı hədsiz az idi.
* Gəncədən də "Xəmsə"nin bir qrup üzvü gəlmişdi. Əvvəlcə qonaqların sayı 25-30 nəfər idi. Amma fasilədən sonra sayları 60-70-ə qədər artdı.
* Oyunu izləyənlər arasında Çindən təşrif buyuran jurnalist Pengli Vu da var idi. O, hətta jurnalistlərimizlə də mehriban söhbət etdi.
* Yusif Nəbiyev oyunboyu müdafiəçidən çox hücumçu kimi diqqəti çəkdi.
* Oyun bitəndən sonra "Kəpəz" futbolçuları sevincini azarkeşlərlə birgə qeyd etdi.

ABDULLA İSMAYILOĞLU