Ötən tur səfərdə “Turan Tovuz” üzərində inamlı qələbə qazanan “Səbail”in iştahı artmışdı.

"Football-plus.az" xəbər verir ki, “Kəpəz”lə oyunun sonlarında qələbəni əldən verən “Qarabağ” isə həftəiçi Avroliqanın qrupuna düşdüyündən məntiqlə bu dəfə meydana həvəsli çıxmalıydı. Əslində oyunun əvvəli elə bundan xəbər verirdi. Artıq 3-cü dəqiqədə Şahruddindən uzun ötürmə alan Keyta Mehremiçlə qapıçı arasındakı anlaşmazlıqdan yararlanıb hesabı açdı. Bundan sonra oyun qızışdı. Qol axtarışında olan "dənizçilər"dən Qomisin zərbəsi qapının üstündən keçdi. Cica buna qarşılıq versə də, Səlahət qola “yox” dedi. O, Juninyonun sevinməsinə də imkan vermədi. 16-cı dəqiqədə cərimə meydançası daxilində Ramalinqom ilə Romaonun mübarizəsi zamanı top ikincinin əlinə dəydi. Referi tərəddüd etmədən “nöqtə”ni göstərdi. VAR otağı da epizodu incələyəndən sonra topa yaxınlaşan Ramalinqom hesabı bərabərləşdirdi. Qoldan sonra "köhlən atlar" yenidən irəli atıldı. Keyta hədəfə düşə bilmədi. Toral iki dəfə cəhd etsə də, birində qeyri-dəqiq zərbə vurdu, digərində qapıçı yerindəydi. Səlahət Keytanın da fərqlənməsinə imkan vermədi. "Dənizçilər"dən Süleymanın uzaqdan zərbəsi qapının üstündəm keçdi. Amma 42-ci dəqiqədə Qomis müdafiəçiləri çaş-baş salandan sonra əlverişli mövqedə olan Ramalinqomu gördü. "90 nömrə" yenə dəqiq zərbəylə hücumu tamamladı. "Səbail" fasiləyə üstün yollandı. "Qarabağ" 2-ci yarıya fəal başladı. Riçardın cərimə zərbəsini qapıçı dəf etdi, Leandronun sevinməsinə isə tir imkan vermədi. 60-cı dəqiqədə cərimə meydançasındakı qarışıqlıq nəticəsində top Elvinin ayağına gəlsə də, onun yaxın məsafədən zərbəsini Səlahət dəf etdi. Bunun cavabında Qomis Şahruddinlə təkbətək çıxaraq topu qapının üstündən vurdu. Ağdamlılar sona yaxın təzyiqi gücləndirsə də, məğlubiyyətdən qaça bilmədi. Ötən mövsüm yalnız iki oyunda uduzan “Qarabağ” bu dəfə artıq 5-ci turdan sonra “normanı doldurub”.

Gözdən qaçmadı
* Tribunada mərhum futbolçu Şəhriyar Rəhimovun üzərində böyük şəkli olan pankart açılmışdı.
* Stadiona 100-dən çox "İmarət Tayfa" fanatı gəlmişdi. Oyunun gedişində, əsas da fasilədən sonra "Qarabağ Ordu"nun üzvləri də bura axışmağa başladı. Kəsəsi, qonaq azarkeşlər "ASCO Arena"da onlar üçün nəzərdə tutulan sektorları, demək olar, doldurmuşdular
* Hər iki komandanın futbolçuları meydana üzərində Şəhriyar Rəhimovun forması olan futbolka ilə çıxdı. İlk dəqiqələrə "Səbail" azarkeşləri "Şəhriyar, Şəhriyar" şüarını səsləndirdi.
* 74-cü dəqiqədə "Səbail"in futbolçuları özünü yerə atdıb “vaxt öldürdüyünə” görə "Qarabağ"ın ehtiyat oyunçular skamyasından Quqeşaşvili referiyə etirazını bildirdi.
* Ramalinqom əvəzlənəndən sonra Şahin Diniyev onu bağrına basaraq minnətdarlıq etdi.

ABDULLA İSMAYILOĞLU