Hər iki komanda ötən tur uğursuzluğa düçar olmuşdu.

"Zirə" “Gəncə” ilə səfər oyunundan qələbəsiz qayıtmış, "Səbail" isə doğma meydanda "Neftçi"yə uduzmuşdu. Odu ki, tərəflər meydana qələbə əzmiylə çıxmışdı. Hakimin start fitindən sonra komandalar oyuna ehtiyatlı başladı. İlk qol axtarışı qonaqlardan gəldi. Qomisin zərbəsi qeyri-dəqiq alındı. Qarşı tərəf Renatonun başla hücumuyla oxşar cavab verdi. 19-cu dəqiqədə Rüstəm ilə Cibrilanın divar paslaşmasından sonra 2-ci dəqiq zərbəylə hesabı açdı. "Dənizçilər" buna Qomisin qapının üstündən keçən həmləsiylə cavab verdi. 31-ci dəqiqədə Rüfətdən ötürməni qəbul edən Nuno "9-luğ"u dəqiq nişan almaqla hesaba tarazlıq gətirdi. "Zirə" qolun şokundan ayılmamış 2-ci zərbəni aldı. 34-cü dəqiqədə Nuno topu cərimə meydançasına daşıyıb Çantakias ilə Tyyaqonun başını gicəlləndirdikdən sonra dubl etməklə komandasının hesabda irəli çıxardı. Hissənin sonrlarına yaxın tərəflərin fərqlənmək üçün şansları olsa da, Rüstəmin sevinməsinə Səlahət imkan vermədi, Nunonun het-trik etməsi üçün isə azacıq dəqiqlik çatmadı. "Dənizçilər" fasiləyə üstün yollandı.
2-ci yarıya "Zirə" üstün başlayacağı gözlənilsə də, komandalar 20 dəqiqəyə yaxın meydanın mərkəzində mübarizə apardı. Kulaçın aşırma zərbəsinə Səlahət seyvlə cavab verdi. 79-cu dəqiqədə "qartallar" istəyinə nail oldu. Qismətin qapı önünə asmasına yetişən Rüstəm başla dəqiq oynamaqla hesaba tarazlıq gətirdi. Matçın sonrakı dəqiqlərini tərəflər yenidən meydanın mərkəzində keçirdilər. Referinin final fiti məhsuldar heç-heçəni rəsmiləşdirdi. Çox güman, tərəflərdən hər biri bu nəticədən razı qaldı. Axı istənilən heç-heçə məğlubiyyətdən daha yaxşıdı.

Gözdən qaçmadı
* Oyunun 14-cü dəqiqəsində "dənizçilər"in Zirəyə gələn azarkeşləri "Şəhriyar, sən bizim ürəyimizdəsən" şüarını səsləndirdilər.
* Oyunu izləyənlər arasında yığmanın köməkçi məşqçisi Arif Əsədov da var idi.
* 19-cu dəqiqədə Cibrila hesabı açandan sonra stadionun diktoru qolun müəllifini elan etmək istəyərkən səsi kəsildi.

ABDULLA İSMAYILOĞLU