Bu mövsüm doğma publika önündə ilk oyuna çıxan "Sumqayıt" ən azı məğlub olmamağa çalışacaqdı.

Qonaq "Neftçi" isə meydandan 3 xalla ayrılmaq niyyətində idi. Hakimin start fitindən sonra qonaqlar daha fəal mübarizə aparmağa başladı. Qapıya ilk zərbə isə 5-ci dəqiqə Koffidən gəldi. Onun uzaq məsafədən vurduğu top qapıdan az fərqlə aralı keçdi. Sanki bu epizod meydan sahiblərini ayıltdı. 12-ci dəqiqədə Kamran Quliyevin baş zərbəsindən sonra top dirəkdən döndü. Qarşılıqlı hücumlar şəraitində davam edən oyunda Sinyaşikinin 24-cü dəqiqədə yaxın məsafədən vurduğu zərbə möcüzə nəticəsində qol olmadı. 28-ci dəqiqədə Kamran növbəti dəfə “çərçivə”yə düşə bilmədi. Qonaqlardan Sinyaşiki çox fəal idi. O, 30-cu və 42-ci dəqiqələrdə cərimə meydançasının daxilindən yaxşı zərbə vura bilmədi.

İkinci yarıya “Sumqayıt” daha fəal başladı. 52-ci dəqiqədə Mantekanın baş zərbəsu qapının üstündən keçdi. “Kimyaçılar” 73-cü dəqiqədə Kamranla daha bir fürsət yaxaladı. Lakin Quliyev Brkiçlə təkbətək dueldən məğlub ayrıldı. Bir dəqiqə sonra isə “Neftçi”də debüt oyununa çıxan Dieqo Valdes Emin Mahmudovun gözəl ötürməsindən sonra topu Mehdi Cənnətovun qoruduğu qapıdan keçirdi. Qoldan sonra meydan sahibləri daha böyük qüvvə ilə irəli atıldı. 87-ci dəqiqədə Səbuhi Abdullazadə, 5-ci uzatma dəqiqəsində isə Suliman hesabı bərabərləşdirə bilərdi. Amma belə olmadı. “Sumqayıt” cari mövsümdə ilk dəfə məğlubiyyətlə barışdı.

Gözdən qaçmadı
* Oyunu izləyənlər arasında tanımış aktyor Ələkbər Əliyev və əməkdar artist Rafael İsgəndərovun oğlu Fuad da var idi.
* “Sumqayıt” azarkeşlərin havaya buraxdığı şarlar arenada maraqlı görüntü yaratdı.
* Start fitindən əvvəl “Sumqayıt”ın prezidenti Riad Rəfiyev “kimyaçılar”ın heyətində 100-cü oyununu keçirən Elvin Bədəlovla Murad Xaçayevə xatirə hədiyyəsi verdi.
* Stadionun ot örtüyü yaxşı durumda deyildi.
* Oyun bitəndən sonra Sumqayıtda yaranan enerji probleminə görə areanın işıqları söndü.

CAVİD ƏLİYEV