Ötən həftə hər iki komanda məğlub olaraq vacib xal itkisiylə üzləşmişdi. Bu üzdən meydanda ölüm-qalım mübarizəsi gedəcəkdi. "Şirlər" elitada qalmaq, "qartallar" isə avrokubok şansını qorumaq üçün qələbə qazanmalıydı.

Hakimin start fitindən sonra meydan sahibləri oyuna daha istəkli başladı. Artıq 3-cü dəqiqədə Raufun ötüməsindən sonra Elvinin zərbəsi tirdən qayıtdı. Qonaqlar buna dərhal cavab verdi. Eldarın müdafiənin arxasına ötürməsini qəbul edən Keytanın zərbəsindən sonra top cüzi fərqlə dirəyin yanından keçdi. Broqnonun fərqlənməsinə isə topu iki cəhddə tutan qapıçı mane oldu. Broqnonun cərimə zərbəsi də təhlükəli alındı. 35-ci dəqiqədə isə hesab açıldı. Keyta cinahla irəliləyib cərimə meydançasına soxuldu. Rəhman topa ayaq qoysa da, Keyta qayıdan topu Kulaça ünvanladı ki, ukraynalının zərbəsi dəqiq oldu. Qoldan sonra "Şamaxı" təşəbbüsü ələ almağa çalışsa da, rəqibin qapısı qarşısında təhlükəli vəziyyətlər yarada bilmədi.

İkinci hissənin əvvəlində Eminin kornerdən qapı önünə asmasına Kamran yüksəlsə də, Nəzirov üçün topu tutmaq çətin olmadı. 57-ci dəqiqədə isə Broqnodan ötürmə alan Keyta cinahla reydini mükəmməl zərbə ilə tamamladı. Fərqi azaltmağa çalışan meydan sahiblərinin heyətində Bahadurla Elvinin cəhdləri uğursuz oldu. "Qartallar"dan Cibrilanın həmləsi zamanı isə top toru yandan silkələdi. 82-ci dəqiqədə Coşqundan ötürməni qəbul edən Sərtan cinahla sürətlə irəliləyərək cərimə meydançasına soxuldu. Onun ötürməsini Rüstəm dəqiq tamamladı. Oyunun sonlarında "şirlər"in heyətində Rövşənlə Raminin cəhdləri qeyri-dəqiq alındı. Beləliklə, hakimin final fiti Rəşad Sadıqovun komandasının inamlı qələbəsini rəsmləşdirdi.

Gözdən qaçmadı
* "Şamaxı" azarkeşləri oyunun startından təxminən 40-50 dəqiqə əvvəl tribunalarda yerini alaraq "Şamaxı"nı elitada saxlamaq lazımdı. Bu çempionatın azərbaycanlılardan təşkil olunan yeganə komandasıdı" şüarını səsləndirdi.
* Şamaxıya 30-40 nəfərlik "Zirə" fanatları da gəlmişdi.
* Hamidu Keyda qol vurandan sonra bunu Rəşad Sadıqovla qeyd etdi.
* İkinci hissədə "Şamaxı"nın çılğın azarkeşlərindən biri Rəşad Sadıqova səsləndi: "Legionerlərə güvənirsən, ölkə üçün futbolçu yetişdir".
* Matçdan sonra "Zirə"nin futbolçuları qələbəni azarkeşləriylə qeyd etdi. Bu vaxt Anar Nəzirov futbolkasını çıxarıb azarkeşlərdən birinə verdi.

ABDULLA İSMAYILOĞLU