Turnir cədvəlinin “zirzəmi”sində qərarlaşan "Səbail"də oyun planında inkişaf gözə dəysə də, nəticələr baxımından vəziyyət ürəkaçan deyil.

Ötən tur səfərdə "Qarabağ"a böyük hesabla uduzan "dənizçilər" bu oyunda meydana minimum 1 xal üçün çıxmışdı. Ötən tur doğma meydanda "Qəbələ"ylə heç-heçə edən "Turan Tovuz" da səfərdə xala köklənmişdi. "Səbail"in itiriləcək heç nəyi olmadığından, "boz qurdlar" isə cari mövsümdə baxımlı oyunla diqqəti çəkdiyindən meydanda mübarizəli və kreativ matç izləyəcəyimiz gözlənilirdi. Amma hakimin start fitindən sonra gözlədiyimizin əksi baş verdi.

Hər iki komanda ehtiyatlı oynadığından mübarizə əsasən meydanın mərkəzində getdi. Amma tədricən meydan sahibləri üstünlüyü ələ almağa başladı. Bunun nəticəsi kimi də ilk təhlükə "dənizçilər"dən gəldi. Cabirdən ötürmə alan Lyuyiçin iti bucaq altından gözlənilməz zərbəsinə qapıçı reaksiya verdi. "Turan Tovuz"un müdafiə xəttini yarmağın çətinliyini anlayan "Səbail"in futbolçuları uzaqdan zərbələrə üstünlük verirdi. Növbəti epizodda Qomisdən ötürməni qəbul edən Lyuyiçin zərbəsi qeyri-dəqiq alındı. Qonaqlar buna Şakirin təkbaşına reyd edərək qapını yoxlamasıyla cavab verdi. Lakin Emil yerində idi. Az sonra Cabirin zərbəsini Tərlan sinəsinə sıxdı. Runi hədəfi nişan alsa da, qapıçı topu tutdu. 29-cu dəqiqədə isə Stasyukdan ötürməni qəbul edən Qomis uzaqdan əla zərbə ilə qapını dəqiq nişan aldı. Qoldan ruhlanan "dənizçilər" hücumlarını davam etdirdi. Ramazanov - Lyuyiç duetinin təşkil etdiyi hücum zamanı serbiyalının zərbəsini Tərlan dəf etdi. İrəliləyən dəqiqələrdə Qomis – Ramazanov - Lyuyiç “üçlüy”ünün təşkil etdiyi hücumda "88” nömrə" yenə hədəfə düşə bilmədi. Maksim də bərbad zərbəylə diqqəti çəkdi. Meydan sahibləri qol epizodalarını sağa-sola xərclədiyi bir vaxtda qonaqlar hissənin sonuna yaxın topa nəzarəti ələ keçirdi. Və 45-ci dəqiqədə Şakirin qapı önü asmasına yüksələn Vəlizadə Balayevi məyus etməklə hesabı bərabərləşdirdi.

Komandalar ikinci hissəyə də ehtiyatlı başladı. Mübarizə 20 dəqiqədən çox əsasən meydanın mərkəzində getdi. Qapıya ilk həmlə isə qonaqlardan gəldi. Runinin zərbəsini Vüqar zərərsizləşdirdi. 77-ci dəqiqədə "Səbail" 2-ci hissədə ən real qol vəziyyətini yaratdı. Mazurek Ağabalanı “gördü”, kapitan isə cərimə meydançasına daxil olub qapını nişan aldı. Lakin Tərlan əla seyvlə qola imkan vermədi. Çexin zərbəsi də hədəfə düşmədi. 81-ci dəqiqədə isə Lyuyiç uzun ötürməylə Zakpanı “gördü”. "11” nömrənin cərimə meydançasına soxulub iti bucaq altından vurduğu zərbəyə Tərlan növbəti seyvlə cavab verdi. Oyunun sonlarında tovuzlular yenidən təşəbbüsü ələ almaqla qol axtarışına çıxdı. Marandiçin cərimə zərbəsindən sonra top qapının üstündən keçdi. Henri və Ehtiramın həmlələrini isə qapıçı zərərsizləşdirdi. Ehtiramın qapı önünə asmasına yüksələn Pusinin zərbəsini də Emil dəf etdi. Beləliklə, referinin final fiti heç-heçəni rəsmləşdirdi.


Gözdən qaçmadı
* Tovuzlu azarkeşlər dövlət bayrağıyla yanaşı, klubun və Türkiyənin bayrağı ilə “silahlanmışdı”. Onlar start fitindən öncə Ayxan Abbasovu alqışladı. Baş məşqçi də öz növbəsində azarkeşlərə təşəkkürünü bildirdi.
* 57-ci dəqiqədə Ağabala Ramazanov 4-cü hakimə "görmürsən, məni tutub dartırlar", - deyə etiraz etdi.
* Hakimin final fitindən sonra tovuzlu azarkeşlər "Turan”, sən bizim ürəyimizsən", “Ayxan, Ayxan” şüarı səsləndirdi. "Turan Tovuz"un futbolçuları isə qazandıqları 1 xalı qeyd etmək üçün azarkeşlərə yaxınlaşıb təşəkkürünü bildirdi.

ABDULLA İSMAYILOĞLU