Kubok oyunlarını da nəzərə alsaq, komandalar cari mövsümdə 6-cı dəfə münasibətləri aydınlaşdırırdı. Ötən həftə kubok matçında səfərdə də "Səbail"i məğlub edən "qırmızı-qaralar" 5 oyun idi uduzmurdu. Bölgə təmsilçisi bu qarşılaşmada da uğurlu seriyanı davam etdirmək istəyirdi. "Dənizçilər" isə kubokdan da əli üzüləndən sonra bütün diqqətini turnir cədvəlinin dibindən qurtulmağa səfərbər edib. Odu ki, Şahin Diniyevin yetirmələr bu oyunda 3 xala köklənmişdi.

Hakimin start fitindən sonra meydan sahibləri oyuna fəal qoşuldu, qapıya ilk həmlə də onlardan gəldi. Asifin cərimə zərbəsindən qapı önünə asmasını Ülvi qeyri-dəqiq tamamladı. Qonaqlar buna Lyuyiçin həmləsiylə cavab versə də, qapıçı topu tutdu. 21-ci dəqiqədə isə hesab açıldı. Asifin cərimə meydançasına ötürməsini Maçado tora qovuşdu. Qoldan sonra da "qırmızı-qaralar" dominantlığını davam etdirdi. Öncə Ülvi yüzfaizlik qol imkanını boşa verdi. "Dənizçilər"dən isə Lyuyiçin cərimə zərbəsindən sonra top cüzi fərqlə qapının üstündən keçdi. Ülvi ilə Urfanın həmlələri də qeyri-dəqiq alındı. 37-ci dəqiqədə Santos - Maçado duetinin təşkil etdiyi hücum nəticəsində Stasyuk avtoqol müəllifi oldu. Qalan dəqiqələrdə oyuna nəzarət "Qəbələ"nin tərəfində olsa da, qapı qarşısında qol vəziyyətləri yaranmadı və meydan sahibləri fasiləyə üstün yollandı.

İkinci yarıda qapıya ilk həmlə "Səbail"dən gəldi. Lakin Qomisin zərbəsi hədəfə düşmədi. 49-cu dəqiqədə isə fərq bir qədər də böyüdü. Maçado Allaşı zərbə mövqeyinə çıxardı ki, ikinci "9-luğ"u dəqiq nişan almaqla hesabı 3:0-a çatdırdı. Bu qol "dənizçilər"i oyatdı. Öncə Çexin zərbəsini qapıçı tutdu. Növbəti epizodda İlkinin qapı önünə asmasını Mirabdulla qapamağa çalışsa da, Atanqana qola imkan vermədi. Qolkiper Lyuyiçin zərbəsini də iki cəhddə dəf etdi. Nəhayət, 69-cu dəqiqədə qonaqlar istəyinə çatdı. İlkinin cərimə meydançasına ötürməsini Ruslan dəqiq zərbəylə tamamladı. Hücumlarını davam etdirən “Səbail”dən Zakpanın zərbəsi qeyri-dəqiq alındı. Lyuyicin növbəti cəhdində isə Atanqana qola mane oldu. Amma qapıçı 85-ci dəqiqədə aciz qaldı. Belə ki, Mirabdulla cərimə zərbəsindən qapını dəqiq nişan almaqla hesab arasındakı fərqi minimuma endirdi. Oyuna əlavə olunan dəqiqələrdə "qırmızı-qaralar" yenidən coşdu. Maçado qapıçının irəli çıxdığını görüb uzaqdan zərbə vursa da, “çərçivə”yə düşə bilmədi. Rövlanın qapı önünə asmasına yüksələn Utziqin fərqlənməsinə isə Balayev imkan vermədi. 90+4-cü dəqiqədə Hani – Utziq - Maçado “üçlüy”ünün təşkil etdiyi hücum zamanı sonuncu dəqiq zərbəylə matçda son nöqtəni qoydu.

Gözdən qaçmadı
* "Səbail"in 30-35 nəfərlik azarkeş qrupu Qəbələyə təşrif buyuraraq komandanı tək buraxmamışdı.
* Matçın startından sonra da yerli azarkeşlər stadiona gəlməkdə idi. Hətta ikinci hissədə də fanatlar tribunalarda yerini tuturdu.
* Oyunun 16-cı dəqiqəsində Ülvi İsgəndərov laysmanla toqquşdu.
* 38-ci dəqiqədə Elmir Tağıyev əvəzlənərəkən Şahin Diniyevlə görüşmədən ehtiyat oyunçular skamyasına yaxınlaşdı.
* Elmir Tağıyevi Cabir Əmirli əvəzləsə də, stadionun diktoru onun əvəzinə Lyuyiçin oyundan alındığını elan etdi.
* Oyun bitəndən sonra "Qəbələ"nin futbolçuları zəfərini azarkeşlərlə qeyd etdi.

ABDULLA İSMAYILOĞLU