Hakimin start fiti səslənən kimi "Qarabağ" meydanın ağası olduğunu göstərməyə başladı.

"Qəbələ"nin futbolçuları topu ələ keçirən kimi Qurban Qurbanovun komandası güclü pressinq tətbiq edirdi. "Köhlən atlar"ın heyətində xüsusilə Elvin fəallığı ilə seçilirdi. Qapıya ilk həmlə də meydan sahiblərindən gəldi. Ozobiçin zərbəsinin qarşısına Məqsəd özünü sipər etdi. Növbəti epizodda isə Zubirin ötürməsini Yankoviç boşa verdi. Qonaqlar buna Abu Akalla cavab verdi ki, Şahruddin topu iki cəhddə tutdu. 30-cu dəqiqədə Ozobiç Rövlanın uzaqlaşdırmaq istədiyi topu hədəfə göndərə bilmədi. "Qarabağ", nəhayət, 43-cü dəqiqədə istəyinə çatdı. Abu Akalın topu itirməsindən sonra Andrade bir qədər irəliləyib əlverişli mövqedə olan Elvini “gördü” ki, gənc müdafiəçi də qüvvətli zərbəylə toru silkələdi.

İkinci hissə də "Qarabağ"ın sürətli hücumları ilə başladı. Öncə Yankoviçin asmasına yüksələn Medina hədəfə düşmədi. Ozobiçin fərqlənməsinə qapıçı imkan vermədisə, Elvinin iti bucaq altından zərbəsi qeyri-dəqiq alındı. Qonaqların cavabı da gecikmədi. Emildən ötürmə alan Utziq topu sol ayağına çəkib zərbə vursa da, istəyinə nail olmadı.

İrəliləyən dəqiqələrdə Ozobiç, Zubir və Şeydayevin sevinməsini Atanqana əngəllədi. 75-ci dəqiqədə isə Zubirin zərbəsindən sonra Qırtımova dəyən top tora daxil oldu. Bundan sonra da "köhlən atlar" hücumları davam etdirdi. 81-ci dəqiqədə Yankoviç dirəyi nişan aldı. Qonaqlardan isə Ülvi qeyri-dəqiq zərbəylə yadda qaldı. 84-cü dəqiqədə Andrade reydini Şeydayevə ötürmə ilə tamamladı ki, forvard qüvvətli zərbəylə oyunda son nöqtəni qoydu.

Gözdən qaçmadı
* Hesab açılandan sonra “Qarabağ”ın azarkeşləri çempionluq bəstələri söyləməyə başladı.
* İlk hissədə Alimi zədələndiyinə görə Atanqana topu meydandan çıxardı. Topu oyuna daxil edən "Qarabağ"ın futbolçuları biranlıq “feyr-pley” qaydasını unutdu.
* 56-cı dəqiqədə künc nöqtəsində Məqsədlə Andrade mübahisə etdi. Hətta “qırmızı-qaralar"ın futbolçusu legioneri itələdi də.

ABDULLA İSMAYILOĞLU