"Sabah" bir gün öncə "Səbail"ə uduzduğuna görə “Qarabağ” bu oyunda qələbə qazanmaqla həm əsas izləyicisindən bir qədər də uzaqlaşacaq, həm də çempionluğa gedən yolu qısaldacaqdı.

"Kəpəz" isə 3 oyundan ibarət uğurlu seriyanı davam etdirmək istəyirdi. Hakimin start fitindən sonra meydan sahibləri oyuna fəal qoşuldu. Və artıq 5-ci dəqiqədə Zubir rəqib müdafiəçiləri bir fəndlə yerə sərərək toru sirkələdi. Qoldan sonra da "köhlən atlar” hücumlarını davam etdirdi.

Növbəti həmlə zamanı Zubir Elvini zərbə mövqeyinə çıxardı. Amma qapıçı fərqin artmasına imkan vermədi. Qonaqların heyətində Abdulla Rzayev də etibarlı oyunu ilə diqqəti çəkirdi. İdris İnqilablı isə komandasının “zəif bənd”i idi.

"Sarı-göylər" ilk qol vəziyyətini 20-ci dəqiqədə yaratdı. Bəhlul başla topu uzaqlaşdırmaq istəyərkən səliqəsiz davrandı. Topu ələ keçirən Junior qapını nişan alsa da, Quqeşaşvili topu kornerə çıxardı. Növbəti epizodda Xvalkonun baş zərbəsindən sonra topu tutmaq da gürcü qapıçı üçün çətin olmadı. 27-ci dəqiqədə isə Quqeşaşvili komanda yoldaşlarının ötürməsinə gecikdi və Şuaybuya qarşı kobud oynadı. Hakim tərəddüd etmədən “nöqtə”ni göstərdi. Lakin qolkiper topa yaxınlaşan Ayzayanın zərbəsini dəf etməklə bir növ günahını udu. Bununla belə, 29-cu dəqiqədə hesab bərabərləşdi.

Turalın künc nöqtəsindən ötürməsinə yüksələn Şuaybu topu başla Xvalkoya yönəltdi ki, onun da zərbəsi qarşısıalınmaz oldu. Hesab bərabərləşəndən sonra Tərlan Əhmədovun komandası pressinq etməyə başladı. "Qarabağ"ı əks-hücumda yaxalayan Ayzaya - Şuaybu cütlüyündən ikincinin zərbəsi cüzi fərqlə yandan keçdi. Hissənin sonuna yaxın "köhlən atlar" yenidən fəallaşdı. Qaranın cərimə zərbəsi qapının üstündək keçdi. "Kəpəz" Tural Rzayevlə növbəti dəfə hücuma keçmək istəyərkən topu ondan “oğurlayan” Elvin sürəti sayəsində xeyli məsafə qət etdikdən sonra Musanı “gördü”. Topu qəbul edən forvard Zamiqdən sıyrılıb zərbə vursa da, top dirəyə dəydi.

Ağdamlılar ikinci yarıya da fəal başladı. Diakabi reydini dəqiq tamamlaya bilmədi. Musadan ötürmə alan Andrade ilə Cəfərquliyevin zərbəsi də hədəfə düşmədi. Musanın fərqlənməsinə isə Sadıqlı imkan vermədi. Hücumları davam etdirən ağdamlılar, nəhayət, rəqibi səhvə məcbur etdi. 55-ci dəqiqədə top Xvalkonun əlinə dəydi. VAR otağından siqnal gələndən sonra referi epizodu qiymətləndirib "Kəpəz"in qapısına penalti təyin etdi. Topa yaxınlaşan Almeyda isə dəqiq oldu.

Qoldan sonra qonaqlar yenidən hücuma atıldı. Lakin Əlicanovun qapı önünə asmasına Şuaybu istədiyi kimi toxuna bilmədi. Oyuna nəzarəti əldən verməyən Qurban Qurbanovun komandası 66-cı dəqiqədə fərqi artırdı. Musadan ötürməni qəbul edən Andrade dəqiq zərbəylə uzaq küncü nişan aldı. İrəliləyən dəqiqələrdə "Kəpəz"dən Kvirkviya, "Qarabağ"dan Elvin diqqət mərkəzinə düşsə də, hər ikisinin zərbəsi qeyri-dəqiq alındı. Veşoviçdən ötürmə alan Ozobiçin iti bucaq altından zərbəsini isə qapıçı dəf etdi. Ramilin dönən topu tora qovuşdurmaq cəhdi də boşa çıxdı. Hakimin final fiti "köhlən atlar"ı çempionluğa bir qədər də yaxınlaşdırdı.

Gözdən qaçmadı

* Mərhum prezident Heydər Əliyevin anadan olmasının 100 illik yubileyi ilə bağlı hər iki komandanın futbolçuları meydana xüsusi forma və "Qoy ədalət zəfər çalsın" plakatıyla çıxdı.

* Emin Əliyev ilk dəfə Misli premyer-liqasında oyun idarə etdi.
Gözdən qaçmadı

* ”Qarabağ”ın azarkeş qrupları “İmarət Tayfa” və “Qarabağ Ordu” tribunada yerini almışdı. “İmarət Tayfa” oyuna xüsusi hazırlıq görmüşdü. Fanatlar yeni bayraqlar və pankartlar ilə komandaya dəstəyini nümayiş etdirirdi.

* “Kəpəz”in azarkeş qrupu “Xəmsə” də “Azərsun Arena”da idi. Gəncəlilər, saylarının az olmasına baxmayaraq, ilk hissədə xüsusilə fəal idi.

* İlk yarının ortalarında “Qarabağ Ordu” ilə “Xəmsə” arasında mübahisə baş verdi. Polisin müdaxiləsi ilə məsələ həllini tapdı. İkinci hissədə isə “Xəmsə” tam “dayandı”. Azarkeşlər bəstələr oxumur, komandaya dəstək göstərmirdi. Hətta 5-10 nəfər xaric digər fanatlar sektorun yuxarısında sıra şəklində düzüllmüşdü.

Maraqlıdı…

Qurban Qurbanov baş məşqçi karyerasında 400-cü qələbəsini qazanıb. “Qarabağ”ın çalışdırıcısının yubileyi “Kəpəz”lə son turun oyununa təsadüf edib. Bu, onun baş məşqçi karyerasında 704-cü matçda qeydə alınıb. 25-ci turun “Qəbələ” ilə görüşündə 700-cü dəfə meydana komanda çıxaran mütəxəssis qısa müddətdə növbəti yubileyini gerçəkləşdirib. Hər iki matçda onun yetirmələri 3:1 hesabı ilə qalib gəlib. 704 qarşılaşmada 178 heç-heçə və 126 məğlubiyyət də qeydə alınıb. Qurbanov karyerası ərzində üç komandaya – “Neftçi”, “Qarabağ” və Azərbaycan millisinə rəhbərlik edib. O, Ağdam klubunda 371, Bakı təmsilçisində 25, yığmada 4 uğura sevinib. İlk qələbəsi debüt matçına təsadüf edib. 2006-cı il avqustun 6-da onun rəhbərlik etdiyi “Neftçi” “Gənclərbirliyi” ilə ev oyununda qalib gəlib (6:1).