Ardıcıl 4 turda uduzan "Şamaxı" meydana uğursuz seriyaya son qoymaq üçün çıxmışdı.

"Sabah" da ötən tur doğma meydanda "Turan Tovuz"dan aldığı məğlubiyyəti unutdurmaq istəyirdi. İlk dəqiqələrdən meydan sahibləri daha ehtiyatlı oynamağa başladı. "Şirlər" top saxlamaqla nisbi üstünlüyə malik idi. Rəhman Daşdəmirov, Fuad Bayramov və Rövşən Şahmuradov fəallığı ilə seçilirdi. Qonaqlardan isə Kaşukla Mikels canfəşanlıq edirdi. Oyunun ilk 30 dəqiqəsi "şirlər"in müəyyən üstünlüyü şəraitində keçsə də, qapılar önündə təhlükəli vəziyyət yaranmadı. Bölgə təmsilçisi top saxlayır, onu itirdikdə meydanın rəqibə aid hissəsində və mərkəzdə pressinq tətbiq edirdi. "Bayquşlar" isə topu ələ keçirərkən cinahdan sürətli keçidlər etməyə çalışırdı. Matçda ilk qol vəziyyəti meydan sahiblərindən gəldi. 32-ci dəqiqədə Rəhmandan uzun ötürmə alan Rövşən bir qədər irəlilədikdən sonra qapını nişan alsa da, top qapının yanından keçdi. Amma tezliklə hakim ofsayd qeydə aldı. Qonaqlar buna Nuriyevin Mikelsi zərbə mövqeyinə çıxarması və almaniyalının bərbad vuruşu ilə cavab verdi. 44-cü dəqiqədə isə Kaşukun cəriməsindən sonra top dirəkdən qayıtdı.

Fasilədən sonra hər iki komandanın ifasında daha yaradıcı oyun müşahidə etdik. İlk qol vəziyyətini yenə meydan sahibləri yaratdı. Nihadın uzun ötürməsini qəbul edən Rövşən sürətlə irəliləyərək rəqibin cərimə meydançasına daxil oldu. Amma onun zərbəsini qapıçı zərəsizləşdirdi. Masazır təmsilçisi buna Kristianın və Volkovun zərbələriylə cavab versə də, qolkiper yerində idi. 64-cü dəqiqədə isə İsayevin kornerdən qapı önünə asmasını qəbul edən İrasabal zərbə endirsə də, Əzizli növbəti dəfə məharətini göstərərək qola imkan vermədi. "Şirlər"in heyətində meydana sonradan çıxan Amil Yunanov irəlidə fəallığı ilə göz oxşadı. Bunun məntiqi nəticəsi kimi Amil 72-ci dəqiqədə Həsənalızadəni sürətdə qabaqlayaraq qarşısıalınmaz zərbəylə İmanovu məyus etdi. Lakin "Şamaxı"nın sevinci çox çəkmədi. 77-ci dəqiqədə İsayev – Mikels - Kaşuk “üçlüy”ünün gerçəkləşdirdiyi hücum zamanı ukraynalı Əzizlini məyus etməklə hesabı bərabərləşdirdi. Bundan sonra oyun bir qədər də canlandı. Qurban Səfərov bir qədər reyd etdikdən sonra cinahdan açılan Amili “gördü”. Lakin onun iti bucaq altından zərbəsi cüzi fərqlə qapının üstündən keçdi. Oyuna əlavə olunan dəqiqələrdə öncə Mikels hədəfə düşmədi. Oyunun kulminasiya nöqtəsi isə 4-cü uzatma dəqiqəsində yaşandı. Komanda yoldaşından ötürmə alan Elçin Mustafayev mərkəzlə xeyli irəlilədikdən sonra qapıya zərbə endirərkən top İrasabalın əlinə dəydi. Referi tərəddüd etmədən “nöqtə”ni göstərdi. Topa yaxınlaşan Amil dəqiq zərbəylə həm özünün, həm də komandasının 2-ci qolunu vurmaqla yekun hesabı müəyyənləşdirdi. Beləliklə, "Şamaxı" 4 oyundan sonra qələbə qazanmaqla 8-ci pilləyə yüksəldisə, "Sabah" ardıcıl ikinci məğlubiyyətlə barışdı.

Gözdən qaçmadı
* Şamaxıya oyundan bir gün öncə qar yağdığından stadionun ətrafı “ağ örpəy”ə bürünmüşdü.
* Tribunada bir çox tanınmış sima var idi. AFFA-nın prezidenti Rövnəq Abdullayev oyunu Şamaxının icra başçısı Tahir Məmmədovla birlikdə izləyirdi. Hakimlər Komitəsinin sədri Barış Şimşəyi də gördük. Türkiyəli hətta matçdan öncə stadionu gəzirdi. Veteran futbolçular İqor Ponomaryovla Vəli Qasımov isə start fitindən öncə mehribancasına söhbət edirdilər.
* Oyundan öncə Xocalı soyqırımının qurbanlarının xatirəsi birdəqiqəlik sükutla yad olundu.
* Matçın startından əvvəl yerli azarkeşlər "Sabah” evinə, futbol sənin nəyinə" şüarını səsləndirdi.
* Zahid Mərdanov "şirlər"in heyətində debüt etdi.
* Amil Yunanov 2-ci qol vurandan sonra belə, tablodakı 1:1 hesabı olduğu kimi qaldı.
* Oyundan sonra "Şamaxı"nın futbolçuları qələbə sevincini azarkeşlərlə bölüşdür. Hətta bir neçə futbolçu formasını çıxararaq fanatlara atdı.

ABDULLA İSMAYILOĞLU