Bu iki komanda ötən mövsüm elitada qalmaq uğrunda mübarizə aparırdısa, yeni mövsümdə daha yüksək yerlər uğrunda mübarizə aparacaqlarını gizlətmirlər.

"Football-plus.az" xəbər verir ki, erkən qol və ya qol vəziyyətləri olmayan oyunun ilk üçdəbiri kəşfiyyat xarakteri daşıdı.

Oyunda hesabı gözlənilmədən qonaqlar açdı. 27-ci dəqiqədə Adillə mübarizədən qalib ayrılan Kamran çətinliklə də olsa, cərimə meydançasında əlverişli mövqedə olan Rövlanı gördü. Yeni transfer dəqiq zərbəylə Səlahəti məyus etdi. Qoldan sonra da qonaqlar “müdafiəyə oturmadı”. Səbuhi uzun ötürməylə Sorqanı zərbə mövqeyinə çıxardı. Amma qapıçı 2-ci qola imkan vermədi. Kahatın həmləsini də qolkiper zərərsizləşdirdi. Meydan sahibləri isə 36-cı dəqiqədə qola yaxın oldu. Nuno qapını yoxlasa da, top az fərqlə yandan keçdi. Hissənin sonlarında və uzatma dəqiqələrində "dənizçilər" təşəbbüsü ələ aldı. Ağabalanın zərbəsini qapıçı dəf etdi, Nunonun cəhdi az fərqlə qapının üstündən keçdi, Luqasinin zerbəsindən sonra Cənnətov topu iki cəhddə tuta bildi.

2-ci yarıya "Səbail" fəal başladı. Bu fəallığın nəticəsi kimi 62-ci dəqiqədə hesab bərabərləşdi. Ağabaladan ötürmə alan Qomis cərimə meydançasına daxil oldu və Bədəlovdan sıyrılandan sonra dəqiq zərbəylə hesabı bərabərləşdirdi. Amma meydan sahiblərinin sevinci çox çəkmədi. 64-cü dəqiqədə "Sumqayıt" rəqibi əks-hücumda yaxaladı. Adil cərimə meydançasında Rövlana qarşı kobudluq etdi. Referi “nöqtə”ni göstərdi və topa yaxınlaşan Sorqa Səlahətə şans vermədi. 69-cu dəqiqədə rəqibi yenə əks-hücumda yaxalayan "kimyaçılar" növbəti qolu vurdu. Kamran müdafiəçiləri çaş-baş salaraq "Səbail"i növbəti dəfə meydanın mərkəzinə dəvət etdi. 3-cü qoldan sonra "dənizçilər"in oyun nizami pozuldu və onlar müdafiəni tam unudub irəli atıldı. Qonaqlar 77-ci dəqiqədə yenidən əks-hücumda sevindi. Əliyev mərkəzdən reyd etdikdən sonra əlverişli mövqedə olan Səbuhini gördü, "8 nömrə" komandasının 4-cü qolunu vurdu. Son saniyələrdə Mantekadan topu qəbul edən Mossi komandasının 5-ci qolunu vursa da, VAR otağından gələn ofsayd qərarı onun sevinməsinə imkan vermədi. Hakimin final fiti qonaqların qələbəsini rəsmləşdirdi. "Sumqayıt" gözlənilmədən çempionata darmadağın, "dənizçilər" isə rüsvayçı yenilgi ilə başladı.

Gözdən qaçmadı
* Oyunun Milli Kino Gününə həsr olunduğu diktor vasitəsiylə səsləndirildi. Futbolçular da oyundan öncə üzərində bu gün qeyd olunan futbolka ilə çıxmışdı.
* Stadiona Sumqayıtdan 50-60 azarkeş təşrif buyurmuşdu. Onlar oyunun startına 15 dəqiqə qalmış şüarlarla komandalarını dəstəkləməyə başladılar. Sonradan sayları bir qədər də artdı.
* Oyunun startından öncə "Səbail"in sabiq futbolçusu Rahid Əmirquliyevə klubun idman direktoru Firuz Abdulla hədiyyə verdi. Həmçinin azarkeşlər üzərində rahidin şəkli olan və ona təşəkkür yazılan plakat da qaldırılmışdı.
* Fasilədə monitorda Azərbaycan kinolarından fraqmentlər nümayiş etdirildi, musiqilər səsləndirildi.
* 69-cu dəqiqədə "Səbail"in məşqçilər korpusundan Elmir Xankişiyev 4-cü hakim Kamranbəy Rəhimovla mübahisə etdi. Lakin Şahin Diniyev özünü yetirərək aranı sakitləşdirdi.