Üçüncü dövrənin son matçında səfərdə "Neftçi"dən 1 xal qoparan "Kəpəz" doğma publika önündə uğuru davam etdirməyə köklənmişdi.

Turnir cədvəlinin dibində qərarlaşan "Səbail" də Gəncə səfərindən əliboş qayıtmağı düşünmürdü. "Kəpəz" ilk dəqiqələrdən hiyləgər ara ötürmələri və cinahdan reydlər ilə rəqib müdafiəsini yarmağa çalışırdı. Oyunda ilk həmlə də meydan sahiblərindən gəldi. Fəriddən ötürmə alan Junior təkbaşına irəliləyərək cərimə meydançasına daxil olub zərbə vursa da, Balayev yerində idi. Sonrakı epizodda Adilin səhvindən sonra topu ələ keçirən Şuaybu cinahdan qapı önünə ötürmə etsə də, Juniorun zərbəsi müdafiəçilərə tuş gəldi. Qonaqlar buna Lyuyiçlə cavab verdi. Amma Orxan qola imkan vermədi. Bir qədər sonra Ayzaya Fəridi zərbə mövqeyinə çıxarsa da, Qustavo özünü topun önünə atdı. Lyuyiçin cərimə zərbəsindən fərqlənmək istəyi də baş tutmadı. Qalan dəqiqələrdə mьbarizə əsasən meydanın mərkəzində getdi və komandalar fasiləyə qolsuz yolandı.

İkinci hissəyə "Kəpəz"in üstün başlayacağı gözlənilsə də, əksi baş verdi. Ağabalanın qapı önünə ötürməsini Zakpa tamamlasa da, top Yusifə dəydi. Sonra Turandan ötürmə alan Zakpa yenə hədəfə düşə bilmədi. Elçinin də zərbəsi qeyri-dəqiq alındı. 65-ci dəqiqədə isə Fəridin kornerdən ötürməsindən sonra topu ələ keçirən Ayzayının zərbəsini Lyuyiç əli ilə qarşıladı. Referi tərəddüd etmədən penalti nöqtəsini göstərdi. Amma topa yaxınlaşan Ayzayanın sevinməsinə Emil mane oldu. Bu məqam "sarı-göylər"i həvəsdən salmadı və 70-ci dəqiqədə Fərid – Yusif - Şuaybu “üçlüy”ünün təşkil etdiyi hücumu nigeriyalı dəqiq tamamladı. İrəliləyən dəqiqələrdə Fəridin cərimə zərbəsi cüzi fərqlə qapının üstündən keçdi. Matenin zərbəsini isə Emil dəf etdi. Qalan dəqiqələrdə meydan sahibləri topa nəzarət etdi, "dənizçilər" isə heç cür toparlana bilmədi. Beləliklə, hakimin final fiti "Kəpəz"in 6 xallıq oyunda qələbəsini rəsmləşdirdi.

[b]Gözdən qaçmadı

*Öncə "Gəncə" basketbol klubunun Üzvləri qazandıqları ölkə kuboku ilə meydanın kənarına dəvət olundu. Azarkeşlər tərəfindən alqışlanan komandanın kapitanı Amil Həmzəyevə "Kəpəz"in üzərində “Gəncə” yazılan “20” nömrəli forması təqdim olundu.
* "Kəpəz"in azarkeşləri qonaq fanatlara sürpriz hazırlamışdı. Belə ki, "dənizçilər"in azarkeşlərinin yer aldığı tribunaya qərənfillər düzülmüşdü. Məsələdən xəbər tutan "Kəpəz" rəsmiləri qısa müddətdə gülləri ordan yığışdırdı.
* Stadionun qazonu bərbad gündə idi. Oyunçular hərəkət etdikcə torpaq parçaları ətrafa yayılırdı.