Başa çatan mövsümdə Stenli kubokunun qalibi olan “Veqas”ın baş məşqçisi Bryus Kessidi tarixi uğura imza atıb.

"Football-plus.az" xəbər verir ki, 58 yaşlı çalışdırıcı XXI əsrdə komandaya başçılıq etdiyi ilk mövsümdəcə bunu bacaran 6-cı mütəxəssis oldu.

Daha əvvəl Pet Berns (“Nyu Cersi”, 2003-cü il), Den Baylsma (“Pittsburq”, 2009), Derril Satter (“Los Anceles”, 2012), Maykl Sallivan (“Pittsburq”, 2016) və Kreyq Berubi (“Sent Luis”, 2019) bu uğura sevinmişdi. Maraqlıdı ki, bu siyahıda yalnız iki baş məşqçi – Berns və Kessidi bütöv mövsüm ərzində komandalarının “sükanı arxasında” oldular. Qalan 4 çalışdırıcı isə artıq müntəzəm çempionatın gedişində təyinat alıblar.

Xatırladaq ki, Kessidi ötən il iyunun 14-də “Veqas”ın baş məşqçisi postuna gətirilib. Komanda pley-offun final seriyasında 5 oyunun nəticəsinə əsasən “Florida”nı 4:1 hesabı ilə üstələdi. Çalışdırıcı karyerasında ilk dəfə Stenli kubokunun qalibi oldu.

Yeri gəlmişkən, “Veqas”ın sahibi Bill Fouli böyük uğurla bağlı təəssüratını bölüşüb. “Bu komanda 6 il ərzində Stenli kubokunu qazanmaq məqsədilə yaradıldı. 2017-ci ildə axmaq açıqlama verdim: 3 ildən sonra pley-offa yüksələcək, 6 ildən sonra isə çempion olacağıq. Oğlanlar bu sözlərimi yadda saxladılar və bunu reallaşdırmaq üçün oynadılar. Mənə “səhrada hokkey? Qum üzərində oynamağı düşünürsüz?”, - söyləyirdilər. Buna görə də qarşınızda real görünməyən, ümumi gözləntiləri aşan hədəflər qoyun və onlara çatın”, - deyə Fouli MHL-in rəsmi saytına açıqlama verib.

Klub çempionluq paradının Las Veqasının küçələrində bu gün təşkil olacağını elan edib. Yürüşün şəhərin mərkəzi küçəsi sayılan Las Veqas Stripdə start götürəcəyi və “Qolden Nayts” arenasında yekunlaşacağı gözlənilir.