Stenli kuboku uğrunda final seriyasının ilk oyununda “Veqas” “Florida” üzərində inamlı qələbə qazandı.

"Football-plus.az" xəbər verir ki, qonaqların forvardı Erik Staal son 17 ildə ilk dəfə Stenli kuboku uğrunda oyunda qol vurdu. Maraqlıdı ki, onun əvvəlki qolu 2006-cı ilə təsadüf etmişdi – “Karolina”nın heyətində “Edmonton”la seriyanın (4:3) 5-ci oyununda rəqib qapısından iki qol keçirmişdi. Beləliklə, Staal MHL tarixinə final seriyalarında ən uzun fasilə ilə fərqlənən ilk hokkeyçi kimi düşdü. Staal Stenli kubokunun finallarında 15 il intervalı (1991-ci ildə “Pittsburq”un, 2006-cı ildə “Karolina”nın heyətində) ilə fərqlənən Mark Rekkinin göstəricisini arxada qoydu.

Bu arada MHL komissarının müavini Bill Deyli Rusiyanın hokkey ictimaiyyətini qəzəbləndirən açıqlama verib. Onun dediyinə görə, rusiyalı hokkeyçilər bu yay Stenli kubokunu vətəninə apara bilməz: “Yox, Stenli kuboku bu yay Rusiyaya getməyəcək”.

Xatırladaq ki, finalda qarşılaşan “Florida” ilə “Veqas”ın hər birinin heyətində Rusiya təmsilçiləri var. Qapıçı Sergey Bobrovski “Florida”nın, hücumçu İvan Barbaşev isə “Veqas”ın formasını geyir. Ənənəyə uyğun olaraq, qalib komandanın bütün oyunçuları kuboku bir neçə günlüyə özünə götürə bilər. Stenli kuboku Rusiyaya sonuncu dəfə 2021-in sentyabrında – heyətində Andrey Vasilevski, Nikita Kuçerov, Mixail Serqaçev və Aleksandr Volkovun da olduğu “Tampa-Bey” qalib gələndə gətirilmişdi. Rusiya Ukrayna ərazisi ilə bağlı işğal planlarını həyata keçirməyə başlayandan sonra – ötən ilin fevralında MHL şimal qonşumuza bu liqanın klublarının gələcəkdə oyunlarının keçirilmə yeri kimi baxmağı dayandırdı, eləcə də saytının və sosial şəbəkə hesablarının rusdilli versiyasını ləğv etdi.

4 iyun
Veqas – Florida 5:2 (1:1, 1:1, 3:0)
Seriyada hesab – 1:0.