Okan Buruku baş məşqçi postuna gətirən ''Qalatasaray'' bu yay ilk transferini həyata keçirib.

İstanbul nəhəngi ''Konyaspor''dan mərkəz müdafiəçisi Əbdülkərim Bardakçını heyətə qatıb. 27 yaşlı futbolçu ilə dördillik müqavilə imzalanıb. Bu transferin qarşılığında ''Qalatasaray'' Konya təmsilçisinə 2,8 milyon avro ödəyəcək və bu məbləğ üç hissəyə bölünərək qarşı tərəfə veriləcək.

Əbdülkərimin ilk mövsümdə məvacibi 17 milyon lirəyə (təxminən 952 mina avroya) bərabər olacaq. Sonrakı mövsümlərin hər birində bu məbləğ artacaq. Ötən mövsüm sərgilədiyi inamlı oyunla hər üç İstanbul nəhənginin diqqətini cəlb edən Bardakçı əslində ''Fənərbaxça''ya keçməyə çox yaxın idi. ''Konyaspor'' ''Fənər''in təklifini qəbul etmişdi. Amma futbolçu ilə klub arasında danışıqlar uğursuz alındı. Əbdülkərimin illik 1 milyon avro məvacib istəməsi başqan Əli Koçu qəzəbləndirdi və danışıqlar zamanı o, futbolçuya ''səncə, bu pula layiqsənmi'' sualını verdi. Əbdülkərim isə bu olaydan sonra danışıqları dayandıraraq ''Qalatasaray''a keçməyə üstünlük verdi. Müdafiəçi olmasına rəğmən ötən mövsüm 34 rəsmi oyunda 5 qol, 3 məhsuldar ötürməlik performansla diqqət çəkən bu futbolçu ''Konyaspor''un öz yetirməsidi və 2011-dən bu klubun şərəfini qoruyur. O, bu illər ərzində ''Adana Dəmirspor'', ''Samsunspor'', ''Giresunspor'', ''Altay''da icarə əsasında çıxış edib və 2020-dən yenidən ''Konyaspor''da oynayırdı.