''Qalatasaray''ın bu qış 5-ci transferini reallaşdırdı
''Qalatasaray''ın ''Lans'' və Polşa yığmasının üzvü Pşemislav Frankovskini transfer etmək üzrə olduğunu xəbər vermişdik.
''Football-plus.az'' az xəbər verir ki, İstanbul nəhəngi keçidi tamamlamaq üçün bir xeyli güc sərf etməli oldu. Çünki ''Lans'' son anda tələbini dəyişərək 7 milyon avro əvəzinə 10 milyon avro istədi. Frankovski isə bunu bildikdən sonra klubla məşqlərə çıxmaqdan imtina etdi. Türkiyə çempionu sonda fransızlara yeni şərtlər təklif etdi.
Hələlik bu transfer icarə əsasında rəsmiləşib. ''Cim-Bom'' 4 aylıq icarə üçün ''Lans''a 1 milyon avro ödəyəcək. Amma müqavilədə məcburi daimi transfer maddəsi də mövcuddu. Bunun qüvvəyə minməsi üçün müəyyən şərtlər həyata keçməlidi. Məsələn, futbolçu müəyyən sayda oyuna çıxmalıdı.
Türkiyə çempionu yayda bu futbolçunu daimi almalı olsa, onunla 3 illik müqavilə imzalayacaq və ''Lans''a əlavə 7 milyon avro ödəyəcək. Frankovskinin illik qazancı isə 1,7 milyon avro təşkil edəcək. Bu mövsümün sonuna qədər isə ona 900 min avro maaş veriləcək. Dünən İstanbula gələn 29 yaşlı futbolçu hava limanında bunları deyib:
''Həqiqətən də çox sevincliyəm. Dünyanın ən böyük klublarından birində oynamaq özəl bir hissdi. Məşqə çıxmaq, yeni komanda yoldaşlarımı tanımaq və xüsusilə də ev oyunlarımızdakı atmosferi görmək üçün indidən səbirsizlənirəm''.
Frankovski əsasən müdafiənin sağ cinahında çıxış edir. Amma karyerası ərzində solda və yarımmüdafiənin mərkəzində oynadığı matçlar da olub. ''Qalatasaray''ın bu qış Ahmed Kutucu, Alvaro Morata, Mario Lemina və Karlos Kuestadan sonra 5-ci yeni transferi olan Frankovski bu mövsüm 21 rəsmi oyunda 5 qol, 2 məhsuldar ötürmə ilə fərqlənib.
ƏLİ
