''Qalatasaray'' onsuz da ulduzlarla bol olan heyətini daha 2 tanınmış futbolçu ilə gücləndirib.

"Football-plus.az" xəbər verir ki, İstanbul nəhəngi ''Tottenhem''in üzvləri - Devinson Sançes ilə Tanqi Ndombeleni heyətinə qatıb.

Kolumbiyalı mərkəz müdafiəçisi olan Sançes ilə ''4+1'' illik müqavilə imzalanıb. Bu transfer ''Cim-Bom''a 9,5 milyon avroya başa gəlib. Bu məbləğ 5 il ərzində bir neçə hissəyə bölünərək ödəniləcək. Sançesin illik maaşı 3,2 milyon avro təşkil edəcək. Peşəkar karyerasına ''Atletiko Nasyonal''da başlayan, bir il ''Ayaks''ın şərəfini qoruyan 27 yaşlı futbolçu 2017-dən bu yana 42 milyon avroya transfer olunduğu ''Tottenhem''in şərəfini qoruyurdu. O, bu klubda 207 rəsmi oyunda 5 qol, 1 məhsuldar ötürmə ilə fərqlənib. Kolumbiya yığmasında isə 54 oyun keçirib və 1 qol vurub. Dünən axşam Türkiyəyə ayaq basan Ndombeleyə gəlincə, ''sarı-qırmızılar'' bu futbolçunu birillik icarəyə götürüblər. Amma icarə haqqı ödənilməyəcək.

Bundan başqa 26 yaşlı futbolçunun maaşının 1 milyon avrosunu ''Tottenhem'' özü ödəməkdə davam edəcək. Ndombelenin yeni klubunda illik qazancı isə 3,13 milyon avro olacaq. Müqavilədə məcburi transfer ilə bağlı maddə yoxdu. ''Qalatasaray'' Ndombelenin performansından razı qalsa, gələn yay onu daimi əsasda transfer edəcək. Amma bunun üçün 15 milyon avro ödəmək lazım olacaq. Əks halda futbolçu London klubuna geri göndəriləcək. ''Tottenhem''in 2019-da ''Lion''dan 62 milyon avroya transfer etdiyi fransalı mərkəz yarımmüdafiəçisi bu klubda 91 oyuna çıxaraq 10 qol, 9 məhsuldar ötürmə ilə yadda qalıb. Ndombele son 2 mövsümü ''Lion'' və ''Napoli''də icarə əsasında keçirib. Hər iki oyunçunun ''Qalatasaray''ın ÇL üçün UEFA-ya göndərəcəyi iştirak ərizəsində yer alacağı gözlənilir.

ƏLİ