Türkiyə mətbuatının yazdığına inansaq, ''Fənərbaxça''nın yeni baş məşqçisi demək olar, bəllidi.

"Football-plus.az" xəbər verir ki, Başqan Əli Koç uzun müddət düşündükdən və bəzi namizədlərlə görüşdükdən sonra üstünlüyü İsmayıl Kartala verib. Təcrübəli mütəxəssis hazırda Həcc ziyarətindədi və İstanbula sabah qayıdacağı gözlənilir. O, qayıdan kimi anlaşma ilə bağlı klub tərəfindən rəsmi açıqlamanın veriləcəyi gözlənilir. Şaiyələrə inansaq, Kartal artıq öz köməkçilərini də müəyyənləşdirib. O, Egemən Korkmaz və Səlcuk Şahinin məşqçilər korpusuna daxil edilməsini istəyir. Çox güman, bu baxımdan bir problem olmayacaq. Çünki Kartal kimi Korkmaz ilə Şahin da Əli Koçun kriteriyalarına tam uyğun gəlir. Koç komandanı camiəni yaxından tanıyan yerli isimlərə həvalə etmək istədiyini bildirmişdi. Egemən 3 il, Səlcuk isə 12 il ''Fənər''də futbolçu kimi top qovub. Kartalın özünə gəlincə, bu, onun İstanbul nəhənginin başında 3-cü dönəmi olacaq. Bu məşqçi daha öncə 2014/15-də və 2021/22-nin 2-ci dövrəsində baş məşqçi vəzifəsini icra etmiş və hər iki halda da ''Fənər'' 2-ci pilləni tutmuşdu. Yeri gəlmişkən, onu da qeyd edək ki, Kartalın başçılığı altında ''sarı-lacivərdlilər'' superliqada ümumilikdə 52 qarşılaşmada 115 xal toplayıblar ki, bu da orta hesabla hər oyuna 2,21 xal deməkdi. Bu, klub tarixində ən azı 15 oyuna çıxmış yerli mütəxəssislər arasında ən yaxşı göstəricidi!