A seriyasında “Roma”nın vahid liderliyi yalnız bir həftə çəkdi.

"Football-plus.az" xəbər verir ki, paytaxt komandası 13-cü turun mərkəzi oyununda “Napoli”yə uduzdu. Nəticədə çempionatda ikihakimiyyətlilik yarandı.

Əvvəlki turda 1-ci yerə çıxan “Roma”nın “Napoli” ilə ev oyununda nəyə nail olacağı maraqla gözlənilirdi. Bu mövsüm A seriyasında heç-heçəyə razılaşmayan paytaxt komandası son çempiona qarşı ciddi nəsə təklif edə bilmədi. Əksinə, qonaqlar ilk dəqiqələrdən meydana yalnız qələbə üçün çıxdıqlarını əyani göstərdilər. Svilar üç epizodda komandasını xilas etsə də, 36-cı dəqiqədə “Napoli”nin qurduğu sürətli əks-hücumun qarşısını ala bilmədi. Neresin qolu qonaqların ilk hissəni minimal üstünlüklə başa vurmasını təmin etdi. Fasilədən sonra Maktominey komandasının ikinci qolunu vurmağa yaxın oldu, amma Svilar buna imkan vermədi. Can Pyero Qasperini Dibalanı mübarizəyə qoşmaqla komandasının hücumunu gücləndirməyə çalışdı. Lakin bu gediş güclü effekt vermədi. Ona görə ki, neapollular həm topla, həm də topsuz oyunda rəqibindən güclü təsir bağışlayırdı. Romalılar yalnız son dəqiqələrdə məğlubiyyətdən qaça bilərdilər. Dibalanın zərbə mövqeyinə çıxardığı Baldantsiyə Milinkoviç-Saviç vaxtında mane oldu. Beləliklə, “Roma” liderlikdən 4-cü yerə düşdü, çərşənbə axşamı Neapolda “Qarabağ”a 2:0 hesabıyla qalib gələn Antonio Kontenin komandası isə daha bir vacib oyunda maksimum xal qazanmaqla şərikli liderliyə yiyələndi.

Çünki turun maraq doğuran digər matçı “Milan”ın qələbəsi ilə nəticələndi. “Latsio” ilə ev oyununun ilk hissəsində qonaqlar daha yaxşı təsir bağışladılar. Xila ilə Zakkanyinin təhlükəli zərbələrini dəf edən Menyan komandasının fasiləyə qol buraxmadan yollanmasında böyük rol oynadı. İkinci hissəyə fəal başlayan milanlılar ilk ciddi cəhdində hesabı açdılar. Tomorinin ötürməsini qola çevirən Leao bu mövsüm A seriyasında 5-ci dəfə qapıya yol tapdı. Hesabın açılmasından ruhlanan Massimiliano Alleqrinin komandası hücumda fəallığı artırdılar. Provedel bir neçə epizodda “Latsio”nu qoldan xilas etdi. Bəzi məqamlarda ev sahibləri qeyri-dəqiq zərbələrlə imkanları boşa verdilər. Son saniyələrdə baş verən epizod böyük mübahisə doğurdu. Romanyolinin zərbəsindən sonra top Pavloviçin dirsəyinə dəydi. Amma hakim videotəkrara dəfələrlə baxandan sonra “Milan”ın qapısına penalti təyin etmədi. Cüzeppe Kollu həmin epizodda Pavloviçin romalıların oyunçusu Maruşiçin kobudluğuna məruz qaldınına qərar verdi. Nəticədə 1:0 hesablı qələbə lombardiyalıları çempionatın şərikli liderinə çevirdi. Bütün turnirlərdə məğlubiyyətsiz seriyası 13 oyuna (9 qələbə, 4 heç-heçə) çatan “Milan” topların daha yaxşı fərqinə əsasən “Napoli”ni arxada qoyaraq 1-ci yerə çıxdı.

Ötən tur derbidə “Milan”a minimal hesabla uduzan “İnter” Çempionlar Liqasında “Atletiko”ya da boyun əymişdi (1:2). Kristian Kivunun komandası “Piza” ilə oyunun favoriti sayılırdı. “Qara-göylər” ilk hissədə rəqib müdafiəsini heç cür yara bilmədilər. Onlar yalnız matçın ikinci yarısında statusunu doğrulda bildilər. Lautaro Martinesin iki qolu bu mövsüm çempionatda “ya qələbə, ya məğlubiyyət” devizi ilə diqqəti cəlb edən “İnter”i topların daha yaxşı fərqinə görə 3-cü yerə yüksəltdi.

“Sassuolo”ya 2:0 hesabıyla qalib gələn “Komo” 6-cı yerdəki mövqeyini qorudu. “Yuventus” isə “Kalyari” üzərində əzmkar qələbə (2:1) ilə 7-ci yerdə qaldı. Ölkə nəhənginin yeni baş məşçqisi Luçano Spallettinin rəhbərliyi altında keçirdiyi 6-cı oyunda da uduzmadığını (3 qələbə, 3 heç-heçə) qeyd edək.

Nəhayət, “Atalanta” çempionatda 8 oyunluq qələbəsiz seriyaya son qoydu. “Fiorentina”nı 2:0 hesabıyla məğlub edən berqamolular rəqibin qələbəsiz seriyasını davam etdirdilər.

13-cü tur
Yuventus – Kalyari 2:1
Yıldız, 27; 45+1 – S.Espozito, 26. (39282)
Yuventus: Perin, Kelli, Kalulu, Koopmeyners, Lokatelli, K.Türam (Miretti, 70), Kostiç (Kambyazo, 46), Makkenni, Konseysao (Kabal, 85), Yıldız (Openda, 85), Vlahoviç (Devid, 31).

Milan – Latsio 1:0
Leao, 51. (73156)
Milan: Menyan, Qabbya, Pavloviç, Tomori, Bertezaqi, Rabyo, Fofana (Loftus-Çik, 86), Modriç, Salemakers, Nkunku (Riççi, 82), Leao.
Latsio: Provedel, Luka Pelleqrini (Tavareş, 85), Romanyoli, Xila, Maruşiç, Başiç (Noslin, 85), Vesino (Dele Başiru, 62), Genduzi, Zakkanyi, İsaksen (Pedro, 70), Dia (Kastelyanos, 62).

Piza – İnter 0:2
L.Martines, 69; 83. (12542)
İnter: Zommer, Bastoni, Açerbi (Diuf, 67), Akanci, Dimarko, Barella, Suçiç (Zyelinski, 46), Çalhanoğlu, Luis Enrike (Bissek, 67), L.Martines (Auqusto, 87), M.Türam (F.Espozito, 67).

Atalanta – Fiorentina 2:0
Kossunu, 41. Lukman, 51. (12542)
Atalanta: Karnesekki, Kossunu, Cimşiti, Hin (Kolaşinats, 86), Bellanova, Zappakosta (Zalevski, 67), Ederson (Paşaliç, 67), De Roon, De Ketelare, Lukman (Sulemana, 77), Skamakka (Krstoviç, 77).
Fiorentina: De Xea, Ponqraçiç, Mari (Komutso, 75), Ranyeri, Parizi, Dodo (Fortini, 64), Zom (Ndur, 79), Facoli (Qudmundsson, 64), Mandraqora, Pikkoli (Riçardson, 79), Ken.

Roma – Napoli 0:1
Neres, 36. (63937)
Roma: Svilar, Ndika, Mançini, Ermoso, Çelik, Fransa (Əl-Şaaravi, 82), Kristante (Əl-Aynaui, 62), Kone, Lorentso Pelleqrini (Beyli, 80), Sule (Dibala, 62), E.Ferqyuson (Baldantsi, 62).
Napoli: Milinkoviç-Saviç, Buoncorno, Rrahmani, Beukema, Olivera, Di Lorentso, Lobotka, Maktominey, Lanq (Politano, 69), Neres (Lukka, 85), Höylunn (Elmas, 80).

Komo – Sassuolo 2:0
Duvikas, 14. Moreno, 53. (12243)

Parma – Udineze 0:2
Zanyolo, 11. Devis, 65-p. (17232)

Leççe – Torino 2:1
Kulibali, 20. Banda, 22 – Adams, 57. (24776)

Cenoa – Verona 2:1
Kolombo, 40. Torsbyu, 62 – Belqali, 21. (29916)

Bolonya – Kremoneze 1:3
Orsolini, 45+3-p. – Payero, 31. Vardi, 34; 50.

1. Milan 13 8 4 1 19-9 28
2. Napoli 13 9 1 3 20-11 28
3. İnter 13 9 0 4 28-13 27
4. Roma 13 9 0 4 15-7 27
5. Bolonya 13 7 3 3 22-11 24
6. Komo 13 6 6 1 19-7 24
7. Yuventus 13 6 5 2 17-12 23
8. Latsio 13 5 3 5 15-10 18
9. Udineze 13 5 3 5 14-20 18
10. Kremoneze 13 4 5 4 16-17 17
11. Sassuolo 13 5 2 6 16-16 17
12. Atalanta 13 3 7 3 16-14 16
13. Torino 13 3 5 5 12-23 14
14. Leççe 13 3 4 6 10-17 13
15. Kalyari 13 2 5 6 13-19 11
16. Cenoa 13 2 5 6 13-20 11
17. Parma 13 2 5 6 9-17 11
18. Piza 13 1 7 5 10-18 10
19. Fiorentina 13 0 6 7 10-21 6
20. Verona 13 0 6 7 8-20 6

Bombardirlər: L.Martines (İnter), Orsolini (Bolonya) - 6, Pas (Komo), Çalhanoğlu (İnter), Leao, Pulişiç (hər ikisi “Milan”) - 5.
Növbəti turun oyunları dekabrın 6-8-i aralığında keçiriləcək: Sassuolo - Fiorentina, İnter - Komo, Verona - Atalanta, Kremoneze – Leççe, Kalyari - Roma, Latsio - Bolonya, Napoli - Yuventus, Piza – Parma, Udineze – Cenoa, Torino - Milan.

Turun rəqəmi
20 – “Kalyari” ilə oyun türk yarımmüdafiəçi üçün ikiqat əlamətdar oldu. O, dubl etməklə “Yuventus”un əzmkar qələbəsində böyük rol oynadı. Kənan bununla adını klubun tarixinə yeni rekordçu kimi yazdı. O, Alessandro Del Pyeroya məxsus göstəricini arxada qoyaraq “Yuventus”un İtaliya çempionatında 20 qol vuran ən gənc oyunçusu oldu. Turin klubunun yetirməsi olan Yıldız əsas komandada 2023-cü ildən çıxış edir.

Turun ulduzu
David Neres (Napoli ) - turun mərkəzi oyununu yüksək səviyyədə keçirdi. “Roma” ilə matçda ən yaxşı keyfiyyətlərini göstərən David hazırda əla formada olduğunu bir daha sübut etdi. Son oyunlarda qolları sıralayan braziliyalı neapolluların həlledici hücumunu özü başlayıb sona çatdırdı.

Turun sitatı
Antonio Konte, “Napoli”nin baş məşqçisi: