A seriyasının 30-cu turu “Latsio” və “Roma” üçün çox düşərli oldu. Liderlər qrupunda qərarlaşan əksər komandalar xal itkisi ilə üzləşdi, paytaxt təmsilçiləri isə növbəti qələbə ilə uyğun ikaraq 2-ci və 3-cü yerdəki mövqeyini möhkəmləndirdilər.
“Football-plus.az” xəbər verir ki, həftəiçi Çempionlar Liqasının (ÇL) ilk oyununda “Milan”a uduzan (0:1) “Napoli”nin çalışdırıcısı Luçano Spalletti cavab görüşü ərəfəsində bir sıra aparıcı oyunçularına az-çox istirahət verməyi lazım bilmişdi. “Verona” ilə matçın gedişi təcrübəli mütəxəssisi qane etmədiyi üçün Zyelinski, Kvaratsxeliya və zədəsini sağaldan Osimheni ikinci hissədə mübarizəyə qoşdu. Lakin heyətdəki yerdəyişmələr neapollulara rəqibin müqavimətini qırmaq imkanı vermədi – 0:0.
“Napoli”nin evdə iki xal itirməsi əsas izləyicisi “Latsio”nun işinə yaradı. Paytaxt komandası “Spetsiya”ya 3:0 hesabıyla qalib gələrək liderlə arasındakı 16 xallıq fərqi 14-ə endirdi. Ardıcıl 4-cü qələbə Mauritsio Sarrinin komandasının ÇL-ə vəsiqə qazanmaq şansını bir qədər də artırdı. “Udineze”nin qapısından 3 cavabsız top keçirən “Roma” da bu turnirin növbəti mövsümündə iştirak şansını qorudu.
Milan klubları isə azarkeşlərini yenə məyus etdilər. Son çempion “Milan” qeyri-optimal heyətlə oynadığı “Bolonya” ilə səfər matçında bir xal qazana bildi – 1:1. ÇL-də “Benfika” ilə cavab oyununu düşünən “İnter” isə “Montsa”ya uduzdu – 0:1. Son mövsümün vitse-çempionu A seriyasında ilk dəfə ardıcıl 3 ev oyununda qol vurmadan məğlub oldu.
Turun rəqəmi
10 – Spetsiyada penalti ilə hesabı açan İmmobile cari mövsümdə çempionatdakı qollarının sayını bu rəqəmə çatdırdı. “Latsio”nun hücumçusu A seriyasında ardıcıl 7-ci mövsümdə rəqib qapılarına azı 10 dəfə yol tapıb. O, bu liqada qələbəyə 3 xal sistemi tətbiq olunan dövrdə Françesko Totti (Roma) və Antonio Di Nataledən (Udineze) sonra bir klubda belə göstəriciyə malik olan 3-cü futbolçudu.
Turun ulduzu
Luka Kaldirola (Montsa) - italiyalı futbolçu komandasının “İnter”dən maksimum xal almasında böyük rol oynadı. Müdafiədə əla təsir bağışlayan Kaldirola qələbə qolunun müəllifi oldu. 32 yaşlı futbolçu A seriyasının cari mövsümündə ilk, ümumilikdə isə 3-cü (iki qola “Benevento”nun formasında sevinib) qolunu vurdu.