A seriyasında mövsüm sona yaxınlaşdıqca avrokuboklara vəsiqələr uğrunda mübarizə daha da gərginləşir. Əlbəttə, diqqətlər Çempionlar Liqasına (ÇL) ayrılan digər üç vəsiqə uğrunda mübarizəyə yönəlib.

Mövsümün sonuna 5 tur qalmış çempion olan “Napoli” ev oyununda “İnter”dən qisasını aldı. Xatırladaq ki, yanvarın 4-də Milanda keçirilən matç ev sahiblərinin 1:0 hesablı qələbəsi ilə nəticələnmişdi. Simone İnzaqinin seçdiyi start heyəti o qədər də güclü deyildi. Amma bunun səbəbi vardı:

onun bütün turnirlərdə ardıcıl 8 qələbə qazanan komandası çərşənbə günü ölkə kubokunun finalında “Fiorentina” ilə qarşılaşacaq. Milanlılar qeyri-optimal heyətlə ev sahiblərinə bir saatdan artıq müddətdə müqavimət göstərə bildilər. Nəhayət, Zambo Angissa 67-ci dəqiqədə Zyelinskinin ötürməsi ilə hesabı açdı. Matçın sonuna yaxın mübarizə daha maraqlı görkəm aldı. Əvvəlcə Lukaku hesabı bərabərləşdirdi. Amma 41-ci dəqiqədə ikinci xəbərdarlığı alan Qalyardininin meydandan qovulmasına görə on nəfərlə oynayan qonaq komanda yorğunluq amilinin güdazına getdi. Di Lorentso ilə Qaetanonun qolları “Napoli”nin 3:1 hesablı qələbəsini təmin etdi. “İnter” bu məğlubiyyətlə 3-cü yerdən 4-ə düşdü.

Çünki “Latsio” azarkeşlərini yenidən ümidləndirdi. Paytaxt komandası səfərdə “Udineze”yə minimal hesabla qalib gəlməklə 3-cü yerə qayıtdı. Yeganə qolu vuran İmmobile İtaliya çempionatında “qol+ötürmə” sistemi üzrə 200-cü (162+38) xalını topladı. 33 yaşlı hücumçu bu planda yalnız Alessandro Del Pyero (299), Antonio Di Natale (255) və Françesko Tottidən (244) geri qalır. “Latsio” ilə bağlı fakt da diqqəti cəlb edir. Paytaxt təmsilçisi A seriyasında qələbəyə görə 3 xal sisteminin tətbiq edildiyi 1994-cü ildən sonra mövsüm ərzində azı 20 oyunda top buraxmayan 4-cü komanda oldu. Daha əvvəl bu göstəriciyə “Milan” (1 mövsüm), “Roma” (2) və “Yuventus” (4) nail olmuşdu.

Milanın eyniadlı digər komandası isə ÇL şansını bir qədər artırdı. Son çempion bu turnirdə mübarizəni dayandırmağın acığını autsayderdən çıxdı: artıq əvvəlki turda gələn mövsümdən B seriyasında çıxış edəcəyi dəqiqləşən “Sampdoriya”nı 5:1 hesabıyla darmadağın etdi. Lakin inamlı qələbə Stefano Pyolinin komandasının 5-ci yerdəki mövqeyini dəyişmədi. Bununla belə, “Milan” indi 4-cü yerdəki “İnter”dən yalnız 2 xal geri qalır. Bu isə sona 2 tur qalmış ciddi fərq sayıla bilməz. Doğrudu, “Milan”ın taleyi heç də öz əlində deyil...

“Fiorentina” Turin səfərində 1 xal qazandı. Halbuki baş məşqçi Vinçentso İtalyano Terraçano, Milenkoviç, Biraqi, Bonaventura, Amrabat, Kastrovilli, Qonsales və Kabral kimi aparıcı oyunçulara ölkə kubokunun “İnter”lə finalı ərəfəsində istirahət vermişdi. Florensiyalılar praktiki olaraq ikinci heyətlə heç-heçəyə nail oldular – 1:1.

Hesabat turu “Kremoneze” azarkeşlərinə böyük məyusluq gətirdi. Komanda evdə “Bolonya”ya 1:5 hesabıyla uduzdu. “Spetsiya”nın Leççe səfərindən xalla (0:0) qayıtması kremonalıların Aseriyasını tərk edəcəyini rəsmiləşdirdi. İndi bu komandalar arasında 7 xallıq fərq var ki, bunu iki tura aradan qaldırmaq mümkün deyil. Deməli, “Kremoneze” bir ildən sonra B seriyasına qayıtmalı olacaq. Maraq üçün Davide Ballardininin komandasının bu mövsüm İtaliya kubokunun yarımfinalına qədər irəlilədiyini və bu mərhələdə “Fiorentina”ya məğlub olduğunu da xatırladaq. Son turlar 3 komanda üçün daha gərgin keçəcək. “Leççe”, “Spetsiya” və “Verona”nın azarkeşlərinin qayğısı daha da artacaq. Bu komandalardan biri mütləq B seriyasına yollanmalı olacaq.

Turun rəqəmi
19 – “İnter” üzərində qələbə “Napoli” üçün əlamətdar oldu. İtaliyanın yeni çempionu tarixində ilk dəfə bir mövsüm ərzində A seriyasında çıxış edən bütün rəqiblərinə - 19 komandaya qalib gəldi.

Turun ulduzu
Olivye Jiru (Milan) - fransız futbolçu “Sampdoriya” ilə matçda komandasının möhtəşəm qələbəsində 3 qolla rol oynadı. 36 yaşlı hücumçu sonuncu dəfə buna 2020-ci il dekabrında 2-də “Çelsi”nin formasında “Sevilya” ilə oyunda (4:0) nail olmuşdu. Olivye onda poker etmişdi.

Turun sitatı
Stefano Pyoli, “Milan”ın baş məşqçisi: “Çempionlar Liqasında mübarizəni dayandırandan sonra belə inamlı qələbə qazanmaq və məyusluğumuzu unutmaq əla oldu. Yetərincə qol vurduq və bu, öz gücümüzə əminliyimizi yenidən bizə qaytaracaq. Mövsümün sonuna iki tur qalıb və aqibətimiz qarşıdakı oyunlardan sonra müəyyənləşəcək. Əlbəttə, Çempionlar Liqasında daha yaxşı oynadıq. Çoxları yarımfinala qədər irəliləməyimizi gözləmirdi. Ötən mövsüm qrupdan çıxa bilməmişdik. Amma yolu sona qədər davam etmək istərdik. A seriyasında isə işlərimiz istənilən səviyyədə getmədi. Bizdə mövsümboyu sabitlik çatmadı. Bugünkü kimi qalib gəlməli olduğumuz oyunlarda xal itirdik. Biz “Milan”ıq, həm İtaliyada, həm də Avropada rəqabətədavamlı olmalıyıq”.