A seriyasının 29-cu turundan sonra “Napoli” ilə əsas izləyicisi “Latsio” arasındakı 16 xallıq fərq dəyişmədi. Səbəb tura ilk iki yerdə başlayan komandaların qələbə qazanması oldu.

Əvvəlki turun ev oyununda “Milan”dan 4 cavabsız top buraxmaqla azarkeşlərini şoka salan “Napoli” “Leççe” ilə səfər matçında da çətinliklə üzləşdi. Görünən odu ki, Luçano Spallettinin komandası aparıcı hücumçusu Osimhensiz oynamaqda çətinlik çəkir. Neapollular hər necə olsa, Leççədən evə 2:1 hesablı qələbə ilə dönməyi bacardılar.

“Latsio”nun rəqibi daha çətin idi. Mauritsio Sarrinin komandası ilk dövrədə “Yuventus”a ağır məğlubiyyətin (0:3) əvəzini evdə çıxmağı bacardı. Romalılar bu dəfə oyun planında turinliləri üstələməklə istəyinə çatdılar. 2:1 hesablı qələbə “qartallar”ın Çempionlar Liqasına vəsiqə verən 2-ci yerdəki mövqeyini möhkəmləndirdi.

Maraqlıdı ki, paytaxtın eyniadlı komandası da Turin təmsilçisi ilə qarşılaşdı. “Roma” səfərdə “Torino”nu Dibalanın penalti ilə vurduğu qolla üstələdi. Başqa sözlə, hesabat turunda Roma Turini 3:1 hesabıyla uddu. Vacib qələbə Joze Mourinyonun komandasına 4-cü yerdən 3-ə çıxmaq imkanı verdi.

Bu, həm də milanlıların turu iki xallıq itki ilə başa vurmasına görə mümkün oldu. “Milan”ın evdə “Empoli”nin qapısına yol tapa bilməməsi gözlənilməz nəticə sayılmalıdı. Qolsuz heç-heçəyə razılaşan çempion A seriyasında keçirdiyi son 5 matçda yalnız bir qələbə qazanıb. Stefano Pyolinin komandası bu oyunlarda hesabına 5 xal yaza bilib.

“İnter”in vəziyyəti daha pisdi. Son mövsümün vitse-çempionu A seriyasında ardıcıl 3 məğlubiyyətdən sonra qələbəyə çox yaxın idi. Lakin “Salernitana” ilə matçın sonunda buraxılan top milanlıların dərin böhranda olduqlarını bir daha göstərdi.

Turun rəqəmi

7 – Leççedə eyniadlı komandaya qalib gələn “Napoli” rəqib meydanlarındakı uğurlu seriyasını davam etdirdi. A seriyasının lideri bu liqanın səfər oyunlarında ardıcıl 7-ci qələbəsini qazandı. “Napoli” yanvarın 4-də Milanda “İnter”ə uduzandan (0:1) sonra “Sampdoriya” (2:0), “Salernitana” (2:0), “Spetsiya” (3:0), “Sassuolo” (2:0), “Empoli” (2:0) və “Torino”nu (4:0) da məğlub etməklə artıq tarixində bir ilki reallaşdırıb.

Turun ulduzu

Mattia Zakkanyi (Latsio) - italyan futbolçu komandasının turun mərkəzi oyununda “Yuventus”dan maksimum xal almasında qol və məhsuldar ötürmə ilə böyük rol oynadı. Zakkanyi artıq A seriyasının cari mövsümündə 10 qolla “Latsio”nun ən yaxşı bombardiridi. 27 yaşlı yarımmüdafiəçi bu liqada meydana çıxdığı 26 oyunda 5 məhsuldar ötürmə də edib.