Türkiyə çempionatının 8-ci turunda debütant ''Gənclərbirliyi'' öz meydanında iki dəfə hesabda geri düşdüyü qarşılaşmada ''Alanyaspor''la 2:2 bərabərə qaldı.

Matça damğa vuran isim qonaqların yarımmüdafiəçisi Yanis Haci oldu. ''Qalatasaray''ın əfsanəsi George Hacinin oğlu olan Yanis 14-cü dəqiqədə cərimə zərbəsini dəqiq yerinə yetirərək Türkiyə çempionatında qol hesabını açdı. İkinci hissədə o, aktivinə məhsuldar ötürmə də yazdı.

Yanisin cərimə zərbəsindən qol vurması türkiyəli futbolsevərlərə və xüsusilə də ''Qalatasaray''lılara nostalji hisslər yaşatdı. Çünki vaxtilə George Haci də standard zərbələrin mahir ifaçısı sayılırdı. O, Türkiyədə çıxış etdiyi 5 il (1996-2001) ərzində superliqada cərimə zərbələrindən ümumilikdə 12 qol vurmuşdu.

George bu cür şəkildə ilk dəfə 1996-cı ilin avqustun 17-də ''Trabzonspor''la ev oyununda fərqlənmişdi. Göründüyü kimi həmin tarixdən 1640 gün sonra onun oğlu da bu turnirdə cərimə zərbəsindən qol vurdu! Yeri gəlmişkən, Yanis kimi George də vaxtilə ''Gənclərbirliyi''nə qol vurmağı bacarmışdı. O, 2000-ci ilin sentyabrın 30-də ''Gənclər''ə qarşı səfər matçında (4:1) cərimə zərbəsindən fərqlənərək komandasını hesabda 2:1 önə keçirmişdi.