''Haci Türkiyədə qazandığı pullarla özünə akademiya açdı''
Rumıniya futbolunun əfsanəsi George Hacinin sabiq meneceri Cici Bekali keçmişə dair maraqlı etirafı ilə diqqət çəkib.
"Football-plus.az" xatırladır ki, Haci ötən əsrin sonlarında ''Qalatasaray''da tarix yazaraq böyük iz buraxmışdı.
O, daha sonra İstanbul nəhəngində 2 fərqli dönəmdə (2004/05, 2010/11) baş məşqçi kimi də çalışmışdı. Haci 2009-da Kostantsa şəhərində futbol akademiyası qurmaq qərarına gəldi. Bu akademiya 2021-ə qədər ''Vitorul''un, 2021-dən bu yana ''Farul''un 'altyapı''sı kimi fəaliyyət göstərir.
Hacinin həm baş məşqçisi, həm də prezidenti olduğu ''Farul'' ötən həftəsonu Rumıniyada çempionluğu rəsmiləşdirdi. Bekalini dinləyək:
''Haci ''Qalatasaray''da oynadığı 5 il ərzində istədiyi hər şeyi qazandı. Çox cəsarətli idi və bu pullara layiq idi. ''Qalatasaray''dan ilk ilimizdə anlaşdığımızdan 500 min dollar artıq pul götürdük. İllik 3,5 milyon dollar maaşa anlaşmışdıq. Amma ordakı maddələrə istədiyim qədər pul əlavə edə bilirdim. Avrokuboklar üçün bir mükafat yox idi. Çempionluq üçün isə 200 min dollar bonus nəzərdə tutulmuşdu. Müqaviləyə avrokubok üçün 2 milyon dollarlıq bonus saldırdım. ''Qalatasaray'' Avropada 2 kubok qaldırdı və Haci də 4 milyon dollar qazandı. Mən hələ Türkiyə daxilində oyun sayı, çempionluq və digər bonusları nəzərə almıram. Haci məhz Türkiyədə qazandığı pullar ilə özünə akademiya açdı''.
ƏLİ
