"Qəbələ" "Şamaxı"ya qarşı

Heç şübhəsiz, bu həftənin ən populyar xəbərləri "Sabah" və "Qarabağ"ın avrokuboklardakı oyunları ilə bağlıdı. Ancaq hələ futboldan doymaq üçün tezdi. Ona görə ki, avqustun son günlərində Misli premyer-liqasının növbəti - 3-cü turunun matçlarına şahidlik edəcəyik.

Üç gün ərzində keçiriləcək bütün qarşılaşmalar "CBC Sport"un efirində canlı yayınlanacaq.

Misli premyer-liqası
1-ci dövrə, 3-cü tur
29 avqust
Qəbələ – Şamaxı
"Qəbələ"nin bu rəqiblə ev oyunlarının balansı: 32:+11=13-8, 37:33.
2006/07 – 0:0; 2007/08 – 2:1; 2008/09 – 0:1; 2009/10 – 0:1, 1:1; 2010/11 – 0:1; 2011/12 – 0:0, 2:1; 2012/13 1:0, 1:2; 2013/14 – 3:2, 1:4; 2014/15 – 1:1, 1:1; 2015/16 – 1:1, 0:0; 2016/17 – 0:0, 4:3; 2017/18 – 3:0, 1:1; 2018/19 – 1:1, 0:0; 2019/20 – 0:4, 1:2; 2020/21 – 0:0, 2:0; 2021/22 – 2:1, 1:1; 2022/23 – 3:1, 2:0; 2025/26 - 0:1, 3:1.
Cəzalı: yoxdu.
"Futbol+"in proqnozu: 40-30-30.
Qəbələ, şəhər stadionu. Saat 18.00.

Mövsümdə ilk “istefa” şüarlarının Qəbələdə səsləndirildiyindən xəbərdarsız. Xatırladaq ki, ötən həftə "Şəfa"nı qəbul edən "qırmızı-qaralar"ın debütanta uduzması azarkeşlərin narazılığına səbəb oldu. Ardından klub prezidenti Fariz Nəcəfovun iclas keçirdiyi və baş məşqçi Kaxaber Sxadadzeyə "barmaq silkələdiyi" haqda informasiyalar yayıldı. Bu üzdən "Şamaxı" ilə matç gürcü mütəxəssis üçün taleyüklü olacaq. Ancaq hər şey bununla yekunlaşmır. Çünki premyer-liqada qalmaq uğrunda mübarizə aparan "Qəbələ" hələ "futbol ili"nin ilk qələbəsini qazanmayıb. Düzdü, "şirlər"in durumu da eynidi. Lakin Azər Bağırovun rəhbərliyi altında mübarizə aparan bölgə təmsilçisi artıq ilk xalını qazanıb və meydana daha yaxşısını bacarmaq üçün çıxacaq. Bölgə təmsilçilərindən hansının istəyinə çatacağını isə sabah öyrənəcəyik.

Bu komandalar indiyə qədər 62 dəfə üz-üzə gəlib. Həmin oyunların 21-də “Qəbələ”, 20-də “Şamaxı” qələbə qazanıb, 21-də qalib müəyyənləşməyib. Topların nisbətində “şirlər” öndədi – 76:71.

Şəfa – İmişli
"Şəfa" bu rəqiblə evdə ilk dəfə qarşılaşacaq.
Cəzalı: yoxdu.
"Futbol+"in proqnozu: 30-40-30.
Sumqayıt, “SOCAR Polymer Arena”. Saat 20.15.

Debütant mövsümə pis başlamayıb. Artıq ilk qələbəsini qazanan "Şəfa"nın psixoloji durumu rəqiblə müqayisədə daha yaxşıdı. Azı ona görə ki, ilk iki turda qələbəyə həsrət qalan "İmişli"ni qəbul edəcək. Bəli, hələ eyni hədəf - premyer-liqada qalmaq uğrunda döyüşən komandaların nəyə nail olacağını söyləmək çətindi. Ancaq şanslar daha hazırlıqlı görünən "Şəfa"nın tərəfindədi desək, yanılmarıq.

30 avqust
Kəpəz - Turan Tovuz
“Kəpəz”in bu rəqiblə ev oyunlarının balansı: 8:+3=2-3, 9:11.
2022/23 – 0:0, 1:0; 2023/24 – 0:2, 2:1; 2024/25 – 0:3, 5:2; 2025/26 – 0:2, 1:1.
Cəzalı: yoxdu.
“Futbol+”in proqnozu: 20-40-40.
Gəncə, şəhər stadionu. Saat 18.00.

Mövsümün ilk Qərb derbisini izləməyə dəyər. Çünki matç təkcə gərgin mübarizə ilə yox, həm də "Kəpəz" və "Turan Tovuz" azarkeşlərinin uzun müddətdən sonra bir-birinə qarşı dəstək yarışıyla əlamətdar ola bilər. Düzdü, Gəncə təmsilçisi bu görüş üçün biletləri baha qiymətə satışa çıxarıb. Təsəvvür edin, ən ucuz biletin qiyməti 3 manatdı. Lakin komandanın uzun fasilədən sonra yenilənmiş Gəncə şəhər stadionunda ilk rəsmi matçını keçirəcəyini nəzərə alsaq, tribunaların tam dolacağını proqnozlaşdıra bilərik. Həm "sarı-göylər"in, həm də "bozqurd"un xala ehtiyacı var. Belədə komandaların yalnız qələbə üçün döyüşəcəyinə şübhə yoxdu.

Bu komandalar indiyə qədər 15 dəfə qarşılaşıb. Bunların 3-də “Kəpəz”, 10-da “Turan Tovuz” qalib gəlib, 2-də “sülh” qeydə alınıb. Topların nisbətində “bozqurd” öndədi – 29:10.

Zirə - Neftçi
"Zirə"nin bu rəqiblə ev oyunlarının balansı: 20:+11=4-5, 23:16.
2015/16 – 2:0, 3:0; 2016/17 – 2:0, *; 2017/18 – 1:0, 0:3; 2018/19 – 1:2, 0:0; 2019/20 – 1:0; 2020/21 – 1:0, 1:0; 2021/22 – 1:2, 1:0; 2022/23 – 0:3, 1:1; 2023/24 - 1:1, 3:1; 2024/25 – 2:0, 1:2; 2025/26 – 2:2, 1:1.
* texniki nəticə top fərqində nəzərə alınmayıb.
Cəzalı: yoxdu.
“Futbol+”in proqnozu: 30-30-40.
Zirə, İdman Kompleksinin stadionu. Saat 20.15.

Bu görüşü əminliklə turun mərkəzi oyunu elan edə bilərik. Ona görə ki, liderlər paytaxt derbisində gücünü sınayacaq. İlk iki turda qələbə qazanan komandalar uğurlu seriyanı davam etdirmək üçün əlindən gələni əsirgəməyəcək. Həmçinin hər iki komanda Konfrans Liqasında iştirak etdiyi üçün çempionat matçlarında daha hazırlıqlı, inamlı görünür. Bu səbəbdən baxımlı oyun izləyəcəyimizi düşünə bilərik. Axı həm də komandalar mövqelərini qoruyub-saxlamağa çalışmalıdılar.

Bu rəqiblər indiyə qədər 41 dəfə üz-üzə gəlib. Bunların 15-də “Zirə”, 14-də “Neftçi” üç xala yiyələnib. 12-də heç-heçə olub. Topların nisbətində “ağ-qaralar” öndədi – 47:44.

31 avqust
Araz-Naxçıvan – Sabah
“Araz-Naxçıvan”ın bu rəqiblə ev oyunlarının balansı: 6:+1=2-3, 7:9.
2023/24 – 2:0, 0:1; 2024/25 – 0:1, 1:1; 2025/26 – 2:2, 2:4.
Cəzalı: yoxdu.
“Futbol+”in proqnozu: 20-30-50.
Qəbələ, şəhər stadionu. Saat 18.00.

Ötən həftə "Neftçi"dən 5 cavabsız top buraxan "Araz-Naxçıvan" daha bir iddialı rəqiblə üz-üzə gələcək. "Qırmızı-ağlar"ın həmin oyunun fiziki və psixoloji təsirindən nə dərəcədə yaxa qurtara bildiyi sual altında olsa da, bunu bacarmağa məcbur olduğu dəqiqdi. Çünki qarşısında Çempionlar Liqasının liqa mərhələsinə vəsiqə qazanan "Sabah" var. O başqa məsələ ki, "Hapoel"ə qarşı 120 dəqiqə oynayan "bayquşlar" meydana aparıcı oyunçuları ilə çıxmayacaq. Naxçıvanlılar bu fürsətdən nə qədər tez yararlansa, o qədər yaxşıdı.

Bu komandalar indiyə qədər 11 dəfə üz-üzə gəlib. Bunların 1-də “Araz-Naxçıvan”, 5-də “Sabah” qələbəyə sevinib, 5-də qalib müəyyənləşməyib. Topların nisbətində “bayquşlar” öndədi – 29:12.

Sumqayıt – Qarabağ
“Sumqayıt”ın bu rəqiblə ev oyunlarının balansı: 26:+5=4-17, 13:60.
2011/12 – 0:0; 2012/13 – 1:6; 2013/14 – 0:3, 1:0; 2014/15 - +:-*, 1:2, 2015/16 – 1:0, 0:2; 2016/17 – 0:2, 0:4; 2017/18 – 1:1, 0:1; 2018/19 – 0:2, 0:6; 2019/20 – 2:1; 2020/21 – 2:2, 0:0; 2021/22 – 0:4, 0:3; 2022/23 – 0:2, 0:6; 2023/24 – 1:6, 1:0; 2024/25 – 0:1, 0:2; 2025/26 – 2:4.
* - texniki nəticə top fərqində nəzərə alınmayıb.
Cəzalı: Səbuhi Abdullazadə (Sumqayıt).
“Futbol+”in proqnozu: 20-30-50.
Sumqayıt, “SOCAR Polymer Arena”. Saat 20.15.

Filipe Kandidonun rəhbərliyi altında mübarizə aparan "Sumqayıt" mövsümə inamlı başlamayıb. Komanda ilk oyunda "Neftçi"yə uduzubsa, "Sabah"la matçı təxirə salınıb. Növbəti rəqibin də çempionluğa iddialı "Qarabağ" olması "kimyaçılar"ın işini korlayır. Lakin "köhlən atlar" da meydana əsas heyət oyunçuları ilə çıxmayacaq. Odu ki, "Sumqayıt" "Tvente" ilə görüşdə yetərincə güc itirən ağdamlıların durumundan istifadə etməlidi, mövsümün ilk xal və ya xallarını qazanmalıdı.
Bu komandalar indiyə qədər 54 dəfə qarşılaşıb. Həmin oyunların 8-də “Sumqayıt”, 41-də “Qarabağ” qələbə qazanıb, 5-də hərəyə bir xal düşüb. Topların nisbətində “köhlən atlar” öndədi – 134:29.

Bu komandaların duelləri ilə bağlı maraqlı məqamlar
// Son iki oyunda 4 qol vurulub. “Şamaxı” son iki matçda xal qazanmayıb.
// “Kəpəz” son 4 qarşılaşmada qalib gəlməyib. “Turan Tovuz” son 6 səfərdə qol vurub.
// Son üç qarşılaşmada heç-heçə qeydə alınıb. “Neftçi” son üç səfərdə xal qazanıb.
// Son iki oyunda 6 və ya daha çox qol vurulub. “Qarabağ” son 4 səfərdə xal itirməyib.
// “Sabah” son 9 matçda uduzmayıb. Son 5 görüşdə hər iki komanda qol vurub.

KƏNAN BAHADIR