Yanis Haci karyerasını Türkiyədə, daha dəqiq desək ''Qalatasaray''da davam etdirə bilər. Rumıniya futbolunun əfsanəsi George Hacinin oğlu olan Yanis 2020-dən bu yana ''Reyncers''in şərəfini qoruyur.

"Football-plus.az" xəbər verir ki, 24 yaşlı yarımmüdafiəçi 2020/21-i mükəmməl keçirərək ''Reyncers''in 10 illik çempionluq həsrətinə son qoymasında mühüm rol oynamışdı. Amma 2022-nin yanvarında diz bağları qopan istedadlı futbolçu faktiki olaraq o vaxtdan bu yana ortalıqda görsənmir.

Təsadüfi deyil ki, həmin vaxtdan bu yana Yanis çempionatda cəmi 4 oyun keçirib. Qlazqo nəhəngi artıq ondan əlini üzüb və yayda bu futbolçu ilə yollarını ayırmağı planlaşdırır. Haciyə ''Sevilya'' və ''Selta'' ilə yanaşı ''Qalatasaray'' da maraq göstərir. Atasının ''Cim-Bom''un əfsanəsi olduğunu və klubla güclü əlaqələrinin olduğunu nəzərə alsaq, Yanisin İstanbul nəhənginə keçmək ehtimalı heç də az deyil.

Hərçənd ilyarımdı zədədən əziyyət çəkən futbolçunun ''Qalatasaray''a hansı fayda verəcəyi də ayrı söhbətin mövzusudu.

Daha öncə ''Vitorul'', ''Fiorentina'', ''Genk''in şərəfini qoruyan Yanis Haci indiyə qədər ''Reyncers''də meydana çıxdığı 92 rəsmi oyunda 15 qol, 21 məhsuldar ötürməlik performans sərgiləyib.

ƏLİ