Bir tərəfdən “Fənərbaxça” ilə amansız çempionluq mübarizəsi aparan “Qalatasaray” digər tərəfdən yavaş-yavaş yeni mövsümlə bağlı planlar cızmağa başlayır.

“Football-plus.az” xəbər verir ki, Türkiyə mətbuatının yazdığına inansaq, yarımmüdafiə xəttində həm səviyyəni, həm də rəqabəti artırmaq istəyən “Cim-Bom” əfsanəvi futbolçusu George Hacinin oğlu Yanislə ciddi şəkildə maraqlanır. Hətta “Axşam” nəşrinin iddiasına görə, futbolçu ilə ilkin razılıq da əldə olunub. Müqavilə ilə “Reyncers”ə məxsus olan Yanis hazırda icarə əsasında “Alaves”də top qovur. Şayiələrə inansaq, o, mövsümü məhz La Liqa klubunda başa vuracaq və yayda İstanbul nəhənginin heyətinə qoşulacaq. Bu keçidin baş tutması ehtimalını artıran daha bir məqam odu ki, Yanis Hacinin “Reyncers”lə müqaviləsinin müddəti yayda başa çatacaq və o, sərbəst futbolçuya çevriləcək. Bu transferdə onun atası Georgenin böyük rol oynadığı iddia edilir. Yanis Avropa klublarından təkliflər alsa da, məhz atasının təkidi və məsləhəti ilə “Qalatasaray”a keçməyə razılıq verib. Qeyd edək ki, 1998-ci ildə İstanbulda doğulan, həm Rumıniya, həm də Türkiyə vətəndaşlığı olan Yanis atası tərəfindən yaradılan “Vitorul”un “altyapı”sında yetişib. Bu klub 2021-ci ildən etibarən “Farul” adı ilə fəaliyyət göstərir. Peşəkar karyerasının ilk illərini bu klubda keçirən Yanis 2016-da 2 milyon avroya “Fiorentina”ya transfer olunsa da, burda özünü göstərə bilmədi. Atası kimi oyun qurucusu mövqeyində çıxış edən və solaxay olan Yanis 2019-cu ildə qısa müddət “Genk”də oynadıqdan sonra “Reyncers”ə transfer olundu. Onun ulduzu məhz bu klubda parladı. Yanis Qlazqo nəhəngi ilə 2021-də ölkə çempionluğunu qazandısa, 2022-də Avropa Liqasının finalına qədər irəlilədi. Amma bu uğurlardan sonra bu istedadlı futbolçunun sanki inkişafı dayanıb. Bəlkə də o, sadəcə, özünə düzgün klub seçə bilməyib. Cari mövsümdə Yanis “Alaves”in heyətində 24 rəsmi oyunda 841 dəqiqə meydanda olub və 2 qol, 1 məhsuldar ötürməlik performans sərgiləyib. Onun atası George Hacini yeni nəsil futbolsevərlər xatırlamasa da, stajlı fanatlar gözəl xatırlayır. O, 1996-2001-ci illərdə “Qalatasaray”da top qovub və 4 çempionluq, 1 UEFA kuboku, 1 Avropa superkuboku daxil olmaqla 10 titul qazanıb. Hazırda “Farul”un həm sahibi, həm də baş məşqçisi olan Haci “sarı-qırmızılar”da 192 oyuna 72 qol vurub. O indiyə qədər də klub tarixinin ən məhsuldar əcnəbi futbolçusudu.