Joze Mourinyo ilə vidalaşdıqdan sonra məşqçi axtarışlarına başlayan və bir çox mütəxəssislə danışıqlar aparan ''Fənərbaxça'' rəhbərliyi nəhayət, seçimini etdi.

"Football-plus.az" xəbər verir ki, bu vəzifəyə Domeniko Tedesko gətirildi. Dünən axşam saatlarında İstanbula ayaq basan italiyalı mütəxəssis ilə ikiillik anlaşma əldə olunub.

Klubdan verilən rəsmi açıqlamada onun köməkçilərindən birinin Gökhan Gönül olacağı vurğulanılıb. Uzun illər ''Fənər''də top qovmuş və məşqçi karyerasına yeni start vermiş Gönül ən son Türkiyənin gənclər yığmasını çalışdırmışdı.

39 yaşlı Tedesko daha öncə ''Şalke-04'', ''Spartak'', ''Leyptsiq''də, eləcə də Belçika yığmasında çalışıb. İtaliya vətəndaşlığı ilə yanaşı Almaniya vətəndaşlığı da olan 39 yaşlı Tedesko yanvardan bu yana işsiz idi.

Məşqçi karyerasında yalnız bir ciddi uğuru olan və onu da ''Leyptsiq''in başında Almaniya kubokunu qazanmaqla əldə edən bu mütəxəssisin təyinatı heç də ''Fənər'' fanatları arasında birmənalı qarşılanmadı. Yenidən İsmayıl Kartalın baş məşqçi postuna gətirilməsini istəyən fanatların müəyyən hissəsi sosial şəbəkələrdə başqan Əli Koçu istefaya dəvət edib.

Tedeskonun yeni vəzifədəki debütü bazar günü ''Trabzonspor''a qarşı prinsipial oyuna təsadüf edəcək.