Türkiyənin gənclərdən ibarət yığma komandasında Gökhan Gönül dönəmi başa çatıb.

''Football-plus.az'' xəbər verir ki, Türkiyə Futbol Federasiyasının qərarı ilə bu mütəxəssislə yollar rəsmən ayrılıb. Hər iki tərəf işbirliyinə görə bir-birinə təşəkkür edib.

Futbolçu kimi daha çox ''Fənərbaxça''dakı çıxışı ilə yaddaşlarda iz buraxan, eləcə də ''Beşiktaş'' və ''Çaykur Rizəspor''da top qovan 40 yaşlı Gönül məşqçilik karyerasına ötən ilin yanvarında start vermişdi. O əvvəlcə bir neçə ay Türkiyənin gənclər yığmasında köməkçi kimi çalışmış, sentyabrda isə baş məşqçi vəzifəsinə gətirilmişdi. Həmin an Türkiyə artıq AÇ-2025-in final mərhələsinə qatılmaq şansını itirmişdi.

Gökhan Gönülün dönəmində nəticələrin ürəkaçan olduğunu söyləmək çətindi. Komanda bu məşqçi ilə debüt matçında Latviya üzərində 3:0 hesablı inamlı qələbə qazansa da, sonrakı 5 qarşılaşmadan 1 qələbə, 4 məğlubiyyət ilə ayrıldı.

TFF sentyabrda start götürəcək AÇ-2027-nin seçmə mərhələsinə başqa məşqçi ilə başlamaq qərarına gəlib. Gökhan Gönülün isə artıq klub karyerasına yönələcəyi güman edilir.