Türkiyənin gənclərdən ibarət yığma komandasının yeni baş məşqçisi bəlli olub.

Xəbər verdiyimiz kimi Türkiyə Futbol Federasiyası bir neçə gün öncə sentyabrdan bu yana bu vəzifəni icra edən Gökhan Gönül ilə yollarını ayırmaq qərarına gəlmişdi.

Qurumdan verilən rəsmi açıqlamada bu vəzifəyə Egemən Korkmazın gətirildiyi bildirilib. 42 yaşlı Korkmaz Türkiyə futbolunda kifayət qədər tanınmış simalardandı. Futbolçu kimi ''Bursaspor'', ''Trabzonspor'', ''Beşiktaş'', ''Fənərbaxça'', ''Vil'', ''İstanbul BŞ'' və ''Ərzurumspor''un şərəfini qoruyub. ''Fənər''in sonuncu dəfə çempion olduğu 2013/14-də Egemən də heyətdə idi. Bu, onun futbolçu kimi qazandığı 6 tituldan biridi.

Türkiyə yığmasında 9 oyun keçirən Korkmaz məşqçilik karyerasına 2019-da start verib. ''Dənizlispor'', ''Ərzurumspor'' və ''Trabzonspor''da köməkçi kimi çalışıb. ''Pro'' lisenziyasına sahib olan Korkmaz ''Trabzonspor''da köməkçi məşqçi kimi ölkə superkuboku və superliqa çempionluğunu qazanıb. Ancaq bu, onun faktiki olaraq müstəqil məşqçi kimi ilk təcrübəsi olacaq.

Sentyabrda start götürəcək AÇ-2027-nin seçmə mərhələsində türkiyəli gəncləri Xorvatiya, Litva, Macarıstan və Ukrayna ilə oyunlar gözləyəcək.