“Sabah”ın sabiq qapıçısı Yusif İmanovun karyerasını Kosovonun “Malışeva” klubunda davam etdirəcəyini xəbər vermişdik. 22 yaşlı qapıçı artıq bu klubun şərəfini qoruyacaq.

Legioner həyatı yaşamağı qarşısına hədəf qoyan İmanov, nəhayət, istəyinə çatdı. Bəs Yusifin komandasının vəziyyəti necədi?

“Malışeva” üç turdan sonra cəmi 1 xalla Kosovo çempionatında 10 komanda arasında 9-cu pillədədi. İlk oyunda 54-cü dəqiqədə azlıqda qalan “Malışeva” “doğma divarlar” arasında “Priştina” önündə darmadağın oldu – 0:4. İkinci turda isə səfərdə “Balkani” ilə oyun heç-heçə bitib – 1:1. İki gün əvvəl isə yenə ev, yenə məğlubiyyət. Yusifin yeni komandası bu dəfə “Dukacini”yə məğlub olub – 0:1.

“Malışeva” Kosovanın ortabab klublarından sayılır. Ötən mövsüm medalçı da olub. Belə ki, sadəcə, “Drita” və “Balkani”dən geri qalan “Malışeva” mövsümü 53 xalla 3-cü yerdə başa vurub.
Kosovoya yollanan azərbaycanlı futbolçu yalnız Yusif deyil. Yayda “Kəpəz”dən ayrılan Elmir Tağıyev Kosovonun “Dreniça” klubuna transfer olunub.

Ötən ay Qırğızıstan “Dordoy”u onu transfer etməkdə israrlı idi. Lakin klubun infrastrukturunu bəyənməyən Tağıyev ora keçməkdən imtina etdi. Elmirin yeni komandası hazırda turnir cədvəlində 5-ci pillədədi. 2 oyundan sonra 4 xal yığıb. İlk turda “Lapi” ilə qolsuz heç-heçə edən komanda iki gün əvvəl “Priştina”nı minimal hesabla məğlub edib (1:0). “Dreniça” çempionatda debütantlardandı. Ötən mövsüm Kosovonun 1-ci liqasında 27 oyuna 58 xal yığaraq lider kimi elitaya yüksəlib.

Elmirlə əlaqə saxladıq, transferlə bağlı fikirlərini öyrəndik. Ümumiyyətlə, bu komandaya gedişində Yusifin, menecerinin rolu olubmu?