Yusif İmanovun vəkili: “Xeyr, onun məhkəməni qazanacağına zəmanət vermirəm”
“Sabah”dan qalmaqalla, müqaviləni birtərəfli şəkildə pozaraq ayrılan Yusif İmanov srağagün Kosovonun “Malışeva” klubu ilə anlaşıb.
“Bayquşlar” hələ də bu qapıçı ilə münasibətləri bitirməyib. Ötən günlərdə klubla əlaqə saxlamışdıq, məsələnin hüquqi yolla həll olunacağını demişdilər. Artıq transfer rəsmiləşib, Yusif müqaviləyə imza atıb.
Gələcəkdə Masazır təmsilçisi ilə qapıçı arasında hansısa problem olmayacaq ki? Bu sualı aydınlaşdırmaq üçün futbolçunun vəkili Elcan Həsənli ilə əlaqə saxladıq:
“Hüquqi məsələlər həll olunmayıb. AFFA-nın Oyunçuların Statusu və Transferi Komitəsinə müraciət etmişik. Müqaviləni pozmağa səbəb klubun davranışı olub. Ərizə qəbul olunub, məsələyə baxılır. Məhkəmə davam edəcək, komitə qərar verəcək. Qərar verməsələr, İdman Arbitraj Məhkəməsinə müraciət edəcəyik. Zəmanət? Xeyr, Yusifin məhkəməni qazanacağına zəmanət vermirəm (gülür). Nə qərar olsa, görəcəyik”.
MÜZƏFFƏR QULUZADƏ
Digər xəbərlər
