“Sabah”la müqaviləni birtərəfli şəkildə pozan Yusif İmanov hələ də klubsuzdu.

"Football-plus.az" xəbər verir ki, gənc qapıçı yeni klub axtarışında olsa da, istəyinə nail ola bilməyib. Belə ki, futbolçunun meneceri Emil Əsədovla əlaqə saxladıqda əcnəbi klublara təklif göndərdiyini dedi. Lakin hələ də səs-soraq yoxdu. Yəqin ki, komanda tapılmayacaq da. Ağlı başında olan heç bir klub İmanovu heyətinə qatmaz. Niyə qatsın ki? Ümumiyyətlə, Yusifin “Sabah”dan ayrılmasının səbəbi nədi? Heyətə düşə bilməmək və toplanışa aparılmamaq.

Aydın məsələdi ki, Stas Pokatilov Yusifdən yaxşı qapıçıdı. Düzdü, Yusifin bir parlaq mövsümü olmuşdu, hətta milliyə də çağrılmışdı. Amma onda “Sabah”da hamı yaxşı idi, 5-6 futbolçu milliyə çağrılırdı. Ondan sonrakı mövsümlərdə isə nə qədər qeyri-sabit olduğu göz qabağında idi. Nicat Mehbalıyevin “Qəbələ”də icarə əsasında uğurlu mövsümü var idi. Onu da qaytardılar, o da inamı doğrulda bilmədi və iki yerli qapıçı ola-ola, klub legioner qapıçı gətirdi. Qazaxıstanlı Pokatilov Yusifdən həm təcrübəlidi, həm də daha inamlı.

Ən azı bu gün “Sabah”ın qapı ilə bağlı hansısa problemi yoxdu. Yusifin heyətə düşə bilməməsini qəbul etməməsi bir tərəfdən yaxşı haldı - əzmkarlığı və eqosu heyətdən kənarda qalmağa icazə vermir. Amma müqaviləni birtərəfli şəkildə pozmaq peşəkarlıqdan uzaq hərəkətdi. Klubla müqavilən var, birtərəfli şəkildə pozmaq nədi? Get rəhbərliklə danış, de ki, heyətə düşə bilmirəm, bu məqam inkişafıma mane olur, ayrılmağıma icazə verin. Bunu demisənsə, razılaşmayıblarsa, menecerin hansısa klubla danışıq aparsa, desin ki, müəyyən məbləğ ödənilsin, transfer edilsin. İnandırıcı deyil ki, heyətdə heç 3-cü olmayan qapıçını hansısa klub israrla saxlamağa davam etsin.

Futbolçunun meneceri klublara qapıçı ilə bağlı bilgi göndərir. Bir klub niyə bu bilgini qəbul etsin? Dörd mövsüm əvvəlki görüntülərə aldanacaq klub uzağı Qırğızıstandan ola bilər. Görüntülər bir qırağa, hansısa klub görsə ki, futbolçu heyətə düşə bilmədiyinə görə müqaviləyə xitam verib – bunu necə qəbul edəcək? “Sabah” futbolçudan kompensasiya tələb etməkdə də tam haqlıdı. Yusifin vəkili Elcan Həsənli də ağır yükün altına girib. İmanovun bu məhkəməni qazanması yenidən əsas heyətdə yer almağına bərabərdi.

Komandadaxili səbəblər nə olur-olsun, hansısa maliyyə problemi yoxdusa, futbolçunun maaşı vaxtında verilirsə, heç bir səbəb müqaviləni birtərəfli qaydada pozmağa əsas vermir. Müqavilə müddəti mövsümün sonunda bitirdi. Bir mövsüm də gözləsəydi, bəlkə də bundan yaxşı olardı. Onsuz da son mövsümü də ancaq ehtiyatda keçirmişdi. Bəlkə icarə əsasında, ya da hansısa yolla “Sabah” da Yusifin gedişinə icazə verərdi...

MÜZƏFFƏR QULUZADƏ