Ötən həftə Canni de Byazi yığmamızın Moldova və Şimali Makedoniyaya qarşı keçirəcəyi yoldaşlıq görüşləri üçün heyətini açıqladı.

Dəvətlilər arasında yalnız Ceyhun Nuriyev yeni simadı. Diqqəti çəkən əsas məqam isə "Sabah"ın əsas heyət üzvünə çevrilən və sabit çıxış edən Yusif İmanovun kənarda qalmasıdı. Gənc qolkiper geridə qalan 14 turda əvəzlənmədən start heyətində meydanda olmaqla komandasının uğurlarında böyük pay sahibidi. Həmçinin cari mövsümdə ən az top buraxan qapıçılar arasındadı. O, yalnız "Qarabağ"ın qolkiperi Luka Quqeşaşvilidən geri qalır. Çoxları hələ ötən mövsümdən özünü yaxşı tərəfdən göstərən gənc qapıçının sırf gənc futbolçu limitinə görə, yəni məcburən oynadıldığını söyləyirdi. Lakin Murad Musayev Yusifdə xüsusi istedad, bacarıq gördüyünü vurğulayaraq, cari mövsümdə də ona güvənməkdədi. Nədənsə hər şeyə fikir verdiyini, nəzərində saxladığını deyən De Byazi cənabları Yusifin performansını görmür və ya görməzdən gəlir. Heç kim iddia edə bilməz ki, "bayquşlar"ın qapıçısı artıq millinin "1 nömrə"si olmaq üçün yetişib və seçmə mərhələdə “çərçivə”ni əminliklə ona həvalə etmək olar. Xeyr! Amma yoldaşlıq oyunlarına İmanov kimi perspektivli qapıçı mütləq dəvət olunmalı və yığmanın ab-havasını duymalıydı.

Sözsüz, hazırda ölkənin əsas komandasının "1 nömrə"si Şahruddin Məhəmmədəliyevdi. Onsuz da "Qarabağ"ın qolkiperinin zədə almaq riski böyükdü. Dağıstanlı millinin toplanışı çərçivəsində ağır zədələnsə və ya ötən mövsüm "Şamaxı", cari “futbol ili”ndə isə "Turan Tovuz" ilə qaşılaşmadakı kimi xəsarət alsa, onu kim əvəzləyəcək? Səlahət Ağayevin nə qədər milli təcrübəsi olsa da, əvvəlki kimi sabit deyil. Emil Balayev Qazaxıstan karyerasından sonra hələ də tam toparlanmayıb, "Səbail"də qeyri-sabit çıxış edir. O, arxada qalan 14 oyunun 10-da 90 dəqiqə oynayıb, 1 görüşdə əvəzlənib, digərində isə meydana sonradan çıxıb. "Səbail"in buraxdığı 20 qoldan 15-i Balayevin “ayağındadı”. Qısası, qolkiper heç klubunda yaxşı performans sərgiləmir. Odu ki, "Səbail"in qapıçısının əvəzinə Yusifin çağrılması daha məntiqli olardı.

Ümumiyətlə, yoldaşlıq görüşlərinin nəticələri əhəmiyyət kəsb etmədiyindən yaxşı olardı ki, yığmamızın hazırkı qapıçı heyətinin əvəzinə Yusif İmanov, Rəşad Əzizli və Orxan Sadıqlı dəvət alardı. "Şamaxı"nın qolkiperi son oyunlarda seyvləriylə komandasının uğurunda əsas pay sahiblərindəndi. Tərlan Əhmədovun gəlişindən sonra uğursuz çıxışla seçilən Kamran İbrahimovun əvəzinə Orxana şans verildi. Həqiqət naminə etiraf etmək lazımdı ki, Orxan "Kəpəz"də yaxşı çıxış edir. "Turan Tovuz"la qərb derbisində də komandasının ən yaxşılarından biri idi. Bir neçə epizodda xilaskara da çevrildi.
Ciddi önəmi olmayan yoxlama matçlarında Şahruddinlə Səlahətin yoxluğunda yalnız nəticə baxımından itirə bilərik. Əvəzində isə millinin ab-havasını dadacaq, gələcək üçün daha güclü Yusif İmanov kimi qapıçı qazanacağıq. Unutmayaq ki, futbolçular klublarında inkişaf etsə də, millidə yoxlama görüşlərində parlayır və məşqçilərin güvənini qazanır.

ABDULLA İSMAYILOĞLU