Yusif İmanov niyə “Sabah”ın iştirak ərizəsindədi? – klubdan və PFL-dən açıqlama
Yusif İmanov məsələsi də bəla oldu başımıza. ABŞ-nin sabiq prezidenti Con Kennedinin ölümü bəlkə heç bu qədər araşdırılmamışdı.
Gənc qapıçının “Sabah”la müqaviləni birtərəfli qaydada pozduğunu bilirsiz. Amma PFL-in saytında yer alan klubun yeni mövsüm üçün iştirak ərizəsində Yusifin də adı var.
Klubun mətbuat xidmətinin rəhbəri Elnur Həmidov “Football-plus.az”a açıqlamasında PFL-ə göndərilən iştirak ərizəsinə Yusifin adını salmadıqlarını dedi.
Bəs adı çəkilən qurum niyə futbolçunu iştirak ərizəsində göstərir. PFL-in Media və marketinq direktoru Sənan Abdullayevlə əlaqə saxladıq:
“Yusifin “Sabah”la 2026-cı ilə qədər müqaviləsi var. Klubdan onun adının çıxarılması ilə bağlı bizə hansısa müraciət gəlmədikcə özbaşına silə bilmərik. Sifariş ərizəsində adını göstərməsələr də, onların futbolçusudu”.
Axı futbolçu sosial şəbəkə hesabında açıqlama yayıb, müqaviləni birtərəfli şəkildə pozub. Sənan Abdullayev bu məsələyə belə reaksiya verdi:
“Futbolçu çox şey danışa, yaya bilər. Söhbət rəsmi sənədlərdən gedir. Yusifin “Sabah”la 2026-cı ilə qədər müqaviləsi var. Futbolçu müqaviləni birtərəfli pozub gedə bilməz. Onun azad agent olması ilə bağlı buraxılış vərəqi verilməlidi. O verilməyibsə, Yusif rəsmi şəkildə “Sabah”ın futbolçusudu.
MÜZƏFFƏR QULUZADƏ
Digər xəbərlər
