“Sabah”ın qapıçısı Yusif İmanovun klubla müqaviləsini birtərəfli qaydada pozduğunu yazmışdıq.

Xatırladaq ki, futbolçu qərarını Masazır təmsilçisinin ona münasibətdə subyektiv yanaşmaya və ayrı-seçkilik hallarına yol verməsi ilə izah edib, uyğun şəraitinin yaradılmaması ucbatından milli və klub karyerasının mənfi təsirə məruz qaldığını bildirib. Qolkiper narazı qaldığı məqamlarla bağlı FİFA-ya da müraciət etmək niyyətindədi. İş ondadı ki, belədə ağla AFFA-nın Oyunçuların Statusu və Transferi Komitəsi gəlir.

İddialar həqiqəti əks etdirirsə, futbolçu niyə yerli federasiyaya üz tutmaq əvəzinə birbaşa ali futbol qurumuna müraciət etməyi planlaşdırır?

Bu sualın ilk hissəsinə cavab tapmaq məqsədilə “Sabah”ın mətbuat xidmətinin rəhbəri Elnur Həmidova müraciət etdik. O, "Football-plus.az"a açıqlamasında klubun hər futbolçu ilə müqavilə öhdəliklərinə tam əməl etdiyini, belə məsələlərə çox həssas yanaşdıqlarını bildirdi. Klubun özünəinamı öz yerində.

Bəs futbolçu etirazını AFFA-nın adı çəkilən qurumuna çatdırıbmı? Qurumun Mətbuat və İctimaiyyətlə Əlaqələr Departamentinin rəhbəri Elnur Məmmədli Yusifdən hansısa müraciətin daxil olmadığını dedi.

Nəhayət, qolkiperin FİFA-ya mümkün müraciətinin qanunauyğun olub-olmadığını öyrənmək üçün Azərbaycan Vəkillər Kollegiyasının üzvü və idman sahəsində vəkil kimi fəaliyyət göstərən Elcan Həsənliylə əlaqə saxladıq. Əvvəlcədən təxmin etdiyimiz kimi, məlum oldu ki, Yusifin bu prosesdəki vəkili məhz Elcan bəy olacaq. Belədə hüquqşunas prosesdə tərəf olduğunu əsas gətirərək suallarımızı cavablamaqdan imtina etdi.

Hər halda, nə qapıçının FİFA-ya müraciət edib-etməyəcəyi dəqiqdi, nə də məsələnin hansı yolla həll olunacağı. O bəllidi ki, Yusif “Sabah”la yollarını ayırıb və narazı şəkildə yaxasını yana çəkib.

Böyük ehtimalla, proses beynəlxalq müstəvidə həll ediləcək.

KƏNAN BAHADIR