Məşhur statistika portallarının və səhifələrinin Çempionlar Liqasının əsas mərhələsinə yüksələcəyini proqnozlaşdırdığı komandalar sırasında “Qarabağ” da var. Özü də demək olar ki, hər biri bu şansı 90 faizdən yüksək qiymətləndirir.

Əbəttə, bunda səfərdə göstərilən möhtəşəm oyunun və qeydə alınan nəticənin rolu böyükdü. Lakin hələ heç nə bitməyib. Şər deməsən, xeyir gəlməz: cavab matçında hər şey ola bilər və “köhlən atlar”ın baş məşqçisi Qurban Qurbanov demişkən, müasir futbolda iki top fərqiylə üstünlüyə arxalanmaq olmaz. Xüsusilə söhbət yuxarıda bəhs edildiyi kimi, tarixi uğurdan gedirsə. Odu ki, bizi narahat edən məqamlardan birinə toxunmasaq, olmaz. Ənənəmiz öz yerində. İş ondadı ki, bu dəfə sözün əsl mənasında ən xırda detallara önəm verməliyik, nəinki matçın taleyində müstəsna rol oynayacağı gözlənilən ədalət təmsilçisinə.

Düzdü, ağdamlılar bu mövsüm həm də nizam-intizamlı oyunuyla rəqiblərinin başını ağrıdıb. Ancaq azarkeşləri narahat edən əsas məsələ - komandanın azlıqda qalması ehtimalı hələ gündəmdədi. Bəli, “Qarabağ” üşün bu yöndə təhlükədən danışanda hər kəsin ağlına eyni futbolçu gəlir. Ancaq indi təkcə Elvin Cəfərquliyev yox, bütün futbolçular necə deyərlər, “fərəqət durmalıdı”. Həmçinin “fit sahibi” fitini yalnız ədaləti təmin etmək üçün çalmalıdı. Keçək əsas məsələyə…

Kleman Türpen… Bəli, söhbət “Qarabağ” – “Ferentsvaroş” matçının baş hakimindən gedir. 1982-ci ildə Fransada dünyaya göz açan referi 2006-cı ildən hakimliklə məşğuldu. İki il ərzində qazandığı uğurlar sayəsində Liqa-1 matçları üçün güvən qazanan “qaraplatarlı” bu çərçivədə idarə etdiyi 301 matçda 980 sarı, 81 qırmızı vərəqə göstərib. 2010-cu ildən FİFA referisi kimi fəaliyyət göstəribsə, 2012-ci ildən UEFA-nın Elit hakimlər qrupunda yer alıb. Türpenin beynəlxalq karyerası yetərincə zəngindi. Ədalət təmsilçisi indiyə qədər avrokuboklar daxilində bütün turnirlərin təsnifat və əsas mərhələlərində, Millətlər Liqasında, dünya çempionatında, Olimpiya Oyunlarında, Klublararası Dünya Çempionatında, 17 və 21 yaşadək futbolçulardan ibarət komandaların Avropa çempionatı matçlarında iş başında olub.

Başqa ölkələr də “fit sahibi”nin xidmətinə ehtiyac duyub. Bu siyahıda Bolqarıstan, Səudiyyə Ərəbistanı, Yunanıstan və BƏƏ var.

Maraq üçün qeyd edək ki, Türpen 2021-сi ildə Avropa Liqasının (“Vilyarreal” – “Mançester Yunayted”), 2022-ci ildə isə Çempionlar Liqasının (“Liverpul” – “Real”) finalını idarə edib.

Türpen bizim üçün də tanış simadı. Belə ki, o, əsas millimizin 2016-cı ildə səfərdə Şimali İrlandiyaya qarşı keçirdiyi matçda baş hakim kimi meydanda olub. Ədalət təmsilçisi həmin vaxt DÇ-2018-in seçmə mərhələ oyununu idarə edib. Qarşılaşma meydan sahiblərinin 4:0 hesablı qələbəsi ilə yekunlaşıb.

Ümumiyyətlə, referi karyerası boyunca idarə etdiyi 637 matçda 2076 sarı, 166 qırmızı vərəqə göstərib. Bu baxımdan Türpeni səbrli və təmkinli ədalət təmsilçisi saymaq mümkündü. Qırmızı vərəqə görmək baxımından da narahat olmağa dəyməz. Təbii ki, səbr kasasını daşırmasaq…

KƏNAN BAHADIR