Bu gün “Qarabağ” Moldedə tarixi oyuna çıxacaq.

Düşünə bilərsiz ki, komandanın az qala hər avrokubok matçından öncə eyni fikirləri yazırıq. Amma həqiqətən durum bu dəfə fərqlidi. “Köhlən atlar” bu gün qələbə qazansa, tarix yazılacaq. Azərbaycan klubu ilk dəfə Avropa Liqasında qrupdan çıxacaq. Təbii ki, bu görüş təkcə “Qarabağ” üçün önəmli deyil, ölkə futbolu üçün də vacibdi. Həm də nəzərə alaq ki, indiki formatda həm Çempionlar Liqası, həm Avropa Liqası, həm də Avropa Liqası sonuncu dəfə keçirilir. Bütün turnirlərdə qrupa düşmək imkanımız çətinləşəcək. Bəlkə də Ağdam, ümumiyyətlə, Azərbaycan təmsilçisini sonuncu dəfə avrokubokların qrup mərhələsində izləyirik. Bu, bir qədər ağır və bəd fikirdi. Amma şər deməsən, xeyir gəlməz. Ümid edək ki, belə olmayacaq.

Keçək oyuna. Futbol ictimaiyyəti “Qarabağ”ın “Molde” səfərində çətin anlar yaşayacağını düşünür. Haqlıdı da. Norveç təmsilçisi də əlinə düşən fürsəti dəyərləndirmək istəyir. Bu, bəlkə də Avropa Liqasının bu gün üçün ən vacib görüşüdü. Bu səbəbdən də diqqətli olmaq lazımdı. Amma içimdə bir sakitlik var. Düşünürəm ki, Qurban Qurbanov hər şeyi əvvəlcədən götür-qoy edib, müəyyən plan qurub. Moldeyə oyuna bir gün qalmış getmək də, orda məşqə çıxmamaq da bunun bir parçasıdı. Bizi narahat etməli olan tək məqam Norveçdə 6 dərəcə şaxtanın olmasıdı. Amma çətinlik çəkməsən, uğur səndən yan qaçar. Yəqin ki, Ağdam təmsilçisinin üzvləri də bunu anlayırlar. Həm də “Molde” “Real”dı, “Barselona”dı, yoxsa “Bavariya”dı? Bu qədər narahat olmağa, stress keçirməyə nə gərək var?! Axşam saat 12-yə kimi səbirli olaq. Komandamıza inanaq. Düşünək ki, “köhlən atlar” Qurban Qurbanovun rəhbərliyi altında Moldeni fəth edərək vətənə geri dönəcək. Bütün ölkə bu qələbənin sevincinə qərq olacaq...

İLKİN SULTANLI