“Qarabağ” ölkə kubokunun yarımfinalının cavab oyunu çərçivəsində “Araz-Naxçıvan”la qarşılaşdı.

Bu matçda qələbə hər iki komanda üçün vacib idi. Ardıcıl ikinci dəfə “qızıl dubl” etmək istəyən “köhlən atlar” da finala yüksəlmək istəyirdi, tarixində ilk dəfə kuboku başı üzərində qaldırmaq niyyətində olan “qırmızı-ağlar” da. Özü də Muxtar Respublika təmsilçisi meydana ilk oyunun nəticəsinə əsasən üstün tərəf kimi çıxmışdı. Düzdü, sonda Qurban Qurbanovun komandası rəqibi darmadağın etdi və finala vəsiqə qazandı. Amma “Qarabağ” belə vacib oyunda yenə ciddi azarkeş dəstəyindən məhrum idi. Çempionluğun biraddımlığında olan, tərəfdarlarına bir mövsümdə iki titul bəxş etmək istəyən komandanın ev oyununda tribunalarda cəmi 1300 azarkeş var idi.

İş ondadı ki, “köhlən atlar”ın premyer-liqa matçlarına da, demək olar ki, məhz elə bu sayda azarkeş gəlir. Bəs ölkə kuboku kimi önəmli yarışın finalına vəsiqə qazanmaq uğrunda mübarizə aparan komandalar daha rəngarəng tribunalara, daha səs-küylü, çılğın və kreativ azarkeşlərə layiq deyilmi?

Görünür, nə klubun stadiona daha çox azarkeş gəlməsi üçün etdiyi çağırışlar işə yarayır, nə də Qurban Qurbanovun. Yəqin ki, tribunalar avrokubokların yeni mövsümündə yada düşəcək. Ancaq o vaxt hansısa uğursuzluq olacağı təqdirdə (şər deməsən, xeyir gəlməz) hesabat tələb etmək haqqınız olmayacaq!

KƏNAN BAHADIR