“Qarabağ” bu gün tarixi uğura - Çempionlar Liqasının əsas mərhələsinə aparan yolda növbəti matçını keçirəcək.

"Football-plus.az" xəbər verir ki, pley-off mərhələsinin ilk oyununda “Ferentsvaroş”un qonağı olacaq ağdamlılar Budapeştdən sərfəli nəticə ilə qayıtmaq üçün tər tökəcək. Matç “CBC Sport”un efirində canlı yayınlanacaq.

Çempionlar Liqası, pley-off, ilk oyun
Ferenstvaroş (Macarıstan) – Qarabağ 1:3
Varqa, 29 - Marko Yankoviç, 50. Kevin Medina, 67. Musa Qurbanlı, 85.
Hakimlər: JOAO PİNYEYRO, Bruno Jezuş, Lusiano Pereyra, Kladio Pereyra (hamısı Portuqaliya).
VAR hakimi: Tyaqo Martinş (Portuqaliya).
VAR hakiminin köməkçisi: Fabio Melo (Portuqaliya).
19 avqust. Budapeşt, “Qroupama Arena”. Saat 23.00.

Bəlkə də “Qarabağ” gələn həftənin çərşənbə günü Tofiq Bəhramov adına Respublika stadionunda keçiriləcək cavab matçında məqsədə çatacaq – əsas mərhələyə vəsiqəni təmin edərək ikinci dəfə tarix yazacaq. Hər halda, həmin günlə bağlı gözləntiləri “ayaqda saxlamaq” üçün məhz bu axşam keçiriləcək matçda sərfəli nəticə qazanmaq vacibdi. Odu ki, “köhlən atlar” son saniyələrə qədər döyüşməli, təslim olmamalı, ən əsası, cavab oyunu üçün ümidləri qoruyub-saxlamalıdı. Bəli, bu gün ümid var və bu, sadəcə bizim ağdamlılara inamımızın məhsulu deyil, həm də real şansların qiymətləndirilməsinin nəticəsidi. Razıyıq ki, “Ferentsvaroş”un heyəti daha bahalıdı. Rəqib bu mərhələyə qədər gəlib çatıbsa, yuxarıdan aşağı baxmaq müştəbehlikdən başqa nəsə olmaz. Ancaq “Qarabağ”ın gücünü və təcrübəsini də nəzərə almalı, belə desək, səmimi danışmalıyıq. Hər halda, nə “köhlən atlar” aşkar favoritdi, nə də “yaşıl qartallar”. Təkcə bu məqam Budepeştə zillənəcək gözlərimizin ümidlə baxması üçün kifayətdi.

“Qarabağ”ın heyətində zədəli və ya cəzalı yoxdu. “Ferentsvaroş”un durumu isə fərqlidi. “Yaşıl-ağlar” zədəli olduqları üçün “köhlən atlar”ın sabiq futbolçusu Julio Romao ilə Habib Mayqanın xidmətindən yararlana bilməyəcək. Həmçinin komanda şənbə günü “Puşkaş Akademiyası”na qarşı keçirilən ev oyununda uduzub – 1:2. Düzdü, baş məşqçi Robbi Kin bu matçda 10 aparıcı futbolçusunu start heyətinə salmayıb. Yalnız Qabor Salaiyə şans verilib. İş ondadı ki, əsas rəqiblərdən birinə məğlubiyyət azarkeşləri xeyli qəzəbləndirib. Deməli, bu gün hədəfi reallaşdırmaq üçün şans da var, imkan da!

KƏNAN BAHADIR