Ötən cümə axşamı “Qarabağ” Avropa Liqasının H qrupunda 4-cü oyununu keçirdi və yenə “Bayer-04”ə məğlub oldu – 0:1.

“Köhlən atlar” Leverkuzen təmsilçisinə ümumi hesabda 1:6 hesabı ilə uduzaraq işini bir qədər çətinləşdirdi. Artıq H qrupunda 2 komandanın 6 xalı var. Bu yazıda Qurban Qurbanovun komandasının növbəti iki qarşılaşmadakı nəticələrə uyğun olaraq, qrupdan necə çıxa biləcəyini diqqətinizə çatdıracağıq...

9 xalla qrupdan çıxmaq

“Qarabağ”ın növbəti oyunu Norveçdə “Molde”yə qarşı olacaq. Ağdam təmsilçisi bu görüşdə qələbə qazansa, qrup ikinciliyini təmin edəcək. Çünki “köhlən atlar” xalını 9-a çatdıracaq. Belədə çempion Bakıda “Həkkən”ə uduzsa da, qrup ikincisi olacaq.

Şər deməsən, xeyir gəlməz. Tutaq ki, “Qarabağ” norveçlilərə uduzdu. Burda top fərqi əsas məqamdı. “Köhlən atlar” evdə “Molde”ni 1:0 hesabıyla məğlub edib. Gərək “Qarabağ” da səfərdə eyni hesabla uduza. Belədə “köhlən atlar”ın qrupdan çıxmaq şansı qalır. Nəzərə alaq ki, son turda “Bayer-04” “Molde”ni qəbul edəcək. “Qarabağ” isə “Həkken”lə qarşılaşacaq. Yuxarıda qeyd etdiyimiz məqam baş tutsa, almanlar norveçliləri, Azərbaycan təmsilçisi isə isveçliləri məğlub etməlidi. Amma gərək “Qarabağ” Bakıda “Həkken”i , “Bayer-04” isə “Molde”ni 5 qolluq fərqlə məğlub etsin. Belə olan məqamda ağdamlıların turnirdəki top fərqi 1-ə, norveçilərdə isə 0-a bərabər olacaq. Bu, nə qədər çətin olsa da, mümkünsüz deyil.
10 xalla qrupdan çıxmaq

“Köhlən atlar”ın qrupda ən çətin oyunu Norveç səfərində olacaq. “Qarabağ” əlinə düşən fürsəti dəyərləndirməlidi. Burda qeydə alınacaq heç-heçə ağdamlılar üçün qrup ikinciliyinin qapısını aralayacaq. Bundan başqa, Konfrans Liqasının pley-offunda iştirak etmək hüququ rəsmiləşəcək. Lakin Qurban Qurbanovun komandasının əsas istəyi Avropa Liqasında yola davam etməkdi. Norveçdəki heç-heçədən sonra Bakıda “Həkken” üzərində istənilən hesablı qələbə “Qarabağ”ın qrup ikincisi olmasını təmin edəcək.


12 xalla qrupdan çıxmaq
Ağdamlılar qrupun ilk iki oyununda həm “Molde”ni, həm də “Həkken”i məğlub edərək hesabına 6 xal yazdı. “Bayer-04”lə görüşlərdə məğlubiyyətlər komandaya psixoloji təsir edib. Lakin indi eyni ssenarini təkrarlamaq lazımdı. “Köhlən atlar” həm Norveçdə, həm də Bakıdakı qarşılaşmalarda qələbə qazanmalıdı. Bununla da xalını 12-ə çatdıracaq komanda avrokuboklar tarixində ilkə imza atacaq. “Qarabağ” Avropa səviyyəli turnirlərdə bir mövsümdə hesabına ən çox xal yazdıran Azərbaycan təmsilçisi olacaq. Bununla da Avropa Liqasının pley-offunda mübarizəni davam etdirəcək.
Gördüyünüz kimi, Qurbanovun komandasının işi çətindi. Lakin əsas məqam budu ki, taleyi öz əlindədi.

İLKİN SULTANLI