Azarkeşləri “Qarabağ”a son 3 oyunda azı 14 min manat ziyan vurub – belə dəstək olar?!

İndiyə qədər “Neftçi”nin azarkeşləri üzündən böyük məbləğdə cərimələr ödəməli olduğunu yazmışıq. Son vaxtlar artıq “Qarabağ”ın tərəfdarları da əzəli rəqibdən bu mənada geri qalmaq istəmir. Ona görə ki, “köhlən atlar” son 3 turda azarkeşləri üzündən maddi ziyan ilə üzləşib.

Azarkeşlər 8-ci turda “Neftçi”, 9-cu turda “Sabah” ilə oyunda rəqibin ünvanına kütləvi şəkildə təhqiramiz ifadələr səsləndirib. AFFA İntizam Komitəsi “Qarabağ”ı əvvəl 5 min, sonra bu hal 2-ci dəfə təkrarlandığı üçün daha 6 min manat cərimə edib. “Qarabağ” tərəfdarlarının “Sabah Arena”da sındırdığı 27 ədəd skamyaya görə stadiona dəymiş zərəri də ödəməli olub. Azarkeşlər 10-cu turda “Qəbələ”nin qonağı olduqları oyunda pirotexniki vasitədən istifadə edib. Bu qayda pozuntusu “köhlən atlar”ın 3 min manat itirməsinə səbəb olub. Hələ onu demirik ki, ağdamlılar “qırmızı-qaralar”la oyunda nə qol vurub, nə də qələbə qazanıb. Sən Allah, belədə pirotexniki vasitədən istifadə etməyə nə ehtiyac var idi?

Maraq üçün qeyd edək ki, həmin tərəfdarlar ilk 7 turda qaydalara əməl edib. Hər halda, hadisələrin axarı “Qarabağ” azarkeşlərinin “Neftçi” tərəfdarlarından daha çox qayda pozmasına gətirib-çıxaracaq. Kluba son 3 matçda 14 min manat ziyan vurmaq heç də dəstək əlaməti deyil...

KƏNAN BAHADIR