''Beşiktaş'' bu yayın ilk transferini reallaşdırmağa yaxındı. Artur Masuaku ilə vidalaşan İstanbul nəhəngi müdafiənin sol cinahını David Yurasek ilə gücləndirmək qərarına gəlib.

"Football-plus.az" xəbər verir ki, ''ağ-qaralar'' həm futbolçunun özü, həm də onun müqavilə ilə məxsus olduğu ''Benfika'' ilə anlaşma əldə ediblər.

''TRT Spor''un məlumatına görə 24 yaşlı çexiyalı futbolçu birillik müddətə icarəyə götürüləcək. ''Beşiktaş'' onu daimi əsasda transfer etmək hüququnu da ələ keçirəcək. Ancaq transferin maddi detalları və digər məqamlar barədə məlumat yoxdu.

Qeyd edək ki, karyerasına vətənində start verən, ''Mlada Boleslav'' və ''Slaviya''nı şərəfini qoruyan Yurasek 2023-ün yayında 14 milyon avroya Lissabon nəhənginə transfer olunub. Ancaq onun Portuqaliya karyerası uğurlu alınmadı.

Yurasek 2024-ün yanvarından icarə əsasında ''Hoffenhaym''da çıxış edirdi. Çexiya yığmasında 11 oyun keçirən solaxay futbolçu geridə qoyduğumuz mövsümdə ''Hoffenhaym''da 22 rəsmi oyuna çıxaraq aktivinə 3 məhsuldar ötürmə yaza bildi.

Bu futbolçunun həftəsonu İstanbula gələcəyi və tibbi müayinədən keçdikdən sonra rəsmi müqaviləyə imza atacağı gözlənilir.