''Beşiktaş''ın gündəmində olan futbolçunun meneceri və atası nələr dedi?
''Beşiktaş''ın transfer hədəfində olan Zəki Amduni ilə bağlı yeni xəbər var.
Müqavilə ilə ''Bernli''yə məxsus olan və geridə qoyduğumuz mövsümü icarə əsasında ''Benfika''da keçirən isveçrəli forvardın meneceri Pol Bollendorf İstanbul nəhəngindən təklif aldıqlarını təsdiqləyərək bunları deyib:
''Zəki üçün ''Beşiktaş''la danışıqlar aparırıq. Hələlik transferin baş tutub-tutmayacağı barədə nəsə demək çox tezdi. Nələr olacağını yaşayıb birlikdə görəcəyik''.
Daha öncə ''Lozanna'' və ''Bazel''də forma geymiş 24 yaşlı futbolçu 2023-cü ildə ''Bernli'' ilə beşillik müqavilə imzalamışdı. Ancaq İngiltərədə onun məhsuldarlığı yüksək olmayınca ''Benfika'' onu icarəyə götürdü. Amduni Portuqaliyada mövsüm ərzində 43 rəsmi oyuna çıxaraq aktivinə 9 qol, 3 məhsuldar ötürmə yaza bildi. Əslində Lissabon nəhəngi onu daimi əsasda transfer etməyin əleyhinə deyil. Amma ''Bernli''nin 20 milyon avroluq tələbi ''Benfika''nı qane etmir. ''Beşiktaş''ın bu futbolçunu icarəyə götürə biləcəyi güman edilir. Qeyd edək ki, hücumda həm mərkəzdə, həm cinahlarda, həm də oyun qurucusu kimi oynaya bilən Zəki Amduni türk ata və tunisəsilli isveçrəli ananın övladıdı. Bu futbolçu hətta Türkiyənin gənclər yığmasında da forma geyib. Amma Cenevrədə doğulduğu üçün sonradan İsveçrə yığmasına üstünlük verib. Atası Hasan Amduni Türkiyə mətbuatına bunları deyib:
''Mən ''Beşiktaş''ın xəstəsiyəm. Elə oğlum da ''Beşiktaş''lıdı. Ən böyük arzum onu ''Beşiktaş'' formasında görməkdi. Amma ''Bernli''nin 20 milyon avroluq gözləntisi var. ''Beşiktaş''ın bu məbləği ödəmək istəyib-istəməyəcəyindən cox şey asılıdı. ''Benfika'' da Zəkinin xidmətində maraqlıdı. Amma məbləğ onlar üçün də yüksəkdi''.
Digər xəbərlər
