Bu qış ''Beşiktaş''dan ayrılan futbolçuların sayı 4-ə çatıb. İstanbul nəhəngi daha öncə Can Keleşi ''Kasımpaşa''ya və Jan Onananı ''Cenoa''ya icarəyə vermişdi.

''Football-plus.az'' xəbər verir ki, transferin son günündə daha iki futbolçu ilə yollar ayrıldı. Söhbət Şer Ndur və Əl Musratidən gedir. ''Qartal'' Nduru mövsümün əvvəlində PSJ-dən birillik icarəyə götürmüşdü. Onun müqaviləsi qarşılıqlı şəkildə ləğv edilib. 20 yaşlı Seneqal əsilli italiyalı yarımmüdafiəçi ''ağ-qaralar''ın heyətində 22 rəsmi oyuna çıxaraq 1 qol, 2 məhsuldar ötürmə ilə fərqləndi.

Ndur karyerasını İtaliyada davam etdirəcək. ''Fiorentina'' onu 5 milyon avroya PSJ-dən daimi əsasda transfer edib. Əl Musrati isə Fransaya yollanıb. ''Monako'' təcrübəli futbolçunu 6 aylığa icarəyə götürüb. Əl Musratinin ''Beşiktaş''dakı qazancını mövsümün sonuna qədər ''knyazlar'' ödəyəcək. ''Monako'' bu oyunçunu yayda birdəfəlik transfer etmək istəsə, İstanbullulara 8 milyon avro ödəməli olacaq.

Xatırladaq ki, Əl Musrati ''Beşiktaş'' tarixinin ən bahalı transferi statusundadı. ''Qartal'' 28 yaşlı liviyalı yarımmüdafiəçini 1 il öncə 1 milyon avroya ''Braqa''dan icarəyə götürmüş, daha sonra isə 2024-ün yayında əlavə 11 milyon avro ödəyərək onu daimi əsasda transfer etmişdi. Amma bu rekord məbləğə baxmayaraq Əl Musrati ''Beşiktaş''da qeyri-adi bir şeylə yadda qalmadı.

Onun Türkiyə karyerası yalnız 38 rəsmi oyun və 3 qoldan ibarət oldu.

ƏLİ