''Qalatasaray''ın ötən yay Çexiya təmsilçisi ''Sparta''ya icarəyə verdiyi Matias Rossun Türkiyəyə geri dönəcəyi məlum olub.

"Football-plus.az" xəbər verir ki, praqalılar bu futbolçunu daimi əsasda transfer etmək istəməyiblər. Klub Rossa xidmətlərinə görə təşəkkür edərək onunla vidalaşıb.

Qeyd edək ki, 24 yaşlı danimarkalı mərkəz müdafiəçisi 2022-ci ildən ''Qalatasaray''ın üzvüdü. İstanbul nəhəngində özünü yaxşı tərəfdən göstərə bilməyən bu futbolçu 2023/24-ü icarə əsasında ''Neymegen''də keçirmişdisə, ötən yay Çexiyaya yollandı.

Ross ''Sparta''da əsas heyət üzvünə çevrilə bilmədi və mövsüm ərzində 17 rəsmi oyuna çıxaraq aktivinə 1 qol yazdı. Onun ''sarı-qırmızılar''la hələ birillik müqaviləsi var. Çox güman bu futbolçunun ya müqaviləsi qarşılıqlı şəkildə ləğv ediləcək, ya da o yenidən başqa kluba icarəyə veriləcək.

Rossdan başqa bu yay Nikolo Zanyolo ilə Viktor Nelssonun da ''Qalatasaray''a icarədən qayıdacağı dəqiqdi. Derrik Kön isə icarə əsasında şərəfini qoruduğu ''Verder''də qalmaq arzusundadı. Elə bu klub da onu daimi əsasda transfer etmək istəyir. Amma klublar arasında hələ ki, anlaşma əldə olunmayıb.