İcarə əsasında ''Verder''də çıxış edən və müqavilə ilə ''Qalatasaray''a məxsus olan Derrik Kön ilə bağlı xəbər var.

''Football-plus.az'' xəbər verir ki, İstanbul nəhəngi bu futbolçunu ötən mövsümün qış fasiləsində 3,35 milyon avroya 2-ci bundesliqa təmsilçisi ''Hannover-96''dan transfer etmişdi. 26 yaşlı sol müdafiəçi 13 oyuna çıxaraq komandaya 1 qolluq fayda vermiş və çempionluqda müəyyən rol oynamışdı.

Buna baxmayaraq o, Okan Burukun rəğbətini qazana bilməmişdi. Kön ötən yay vətəninə qayıtmağa üstünlük verdi. ''Verder'' onu birillik icarəyə götürdü. İlk dövrədə Kön Bremen təmsilçisində əsas heyət üzvü sayılırdı. ''Verder'' onu daimi əsasda heyətinə qatmaq istəsə, mövsümün sonunda ''Qalatasaray''a 5,125 milyon avro ödəməli olacaq. ''Musiqiçilər''in bu maddədən yararlanacağı güman edilirdi. Amma son aylarda vəziyyət dəyişib.

Derrik Kön əsas heyətdəki yerini itirməyə başlayıb. Son 4 rəsmi qarşılaşmanın hamısında isə o, ümumiyyətlə meydana çıxmayaraq ehtiyatda oturub. Almaniya mətbuatının yazdığına inansaq, ''Verder'' rəhbərliyi bu futbolçu ilə bağlı yekun qərarını verib.

Bremen klubu Könü daimi əsasda transfer etməmək qərarına gəlib! Bu da o deməkdi ki, solaxay futbolçu mövsümün sonunda İstanbula qayıdacaq.

Könün ''Qalatasaray''la 2026-nın yayına qədər müqaviləsi var.